असाेज ६, दमक, झापा – हालै २३ र २४ गतेको जेन्जी आन्दोलनका क्रममा जलेर ध्वस्त भएको दमक ट्राफिक प्रहरी कार्यालय धमाधम पुनर्निर्माण भइरहेको छ। आन्दोलनका कारण सम्पूर्ण सामग्री चोरी र आगजनीमा नष्ट भएपछि ट्राफिक प्रहरी विछन्द अवस्थामा कोही घरमा त कोही डेरामा बसिरहेका थिए।

रोयल स्पोर्टिङ क्लब दमकले कार्यालय पुनर्निर्माणको जिम्मा लिएर आवश्यक सामग्रीको व्यवस्थासहित निर्माण कार्य अन्तिम चरणमा पुर्‍याएको छ। क्लबका अध्यक्ष तथा दमक उद्योग वाणिज्य सङ्घका वरिष्ठ उपाध्यक्ष राजु खड्काले विभिन्न दाताको सहयोगमा चाँडै नै कार्यालयलाई पूर्ण रूपमा स्थापना गरी चाडपर्वलाई लक्षित गर्दै सेवा पुनः सुरु गर्ने जानकारी दिनुभयो।

रिता फार्मेसीका सञ्चालक खगेन्द्र बजगाईंले रु. २०,००० बराबरको किचन सामग्री सहयोग गर्नुभएको छ भने मानबहादुर खड्काले कार्यालयको वायरिङका लागि आवश्यक विद्युतीय सामग्री उपलब्ध गराउन रु. २०,००० सहयोग गर्नुभएको हो। साथै अन्य दाताहरूको सहयोगमा रंगरोगन, इलेक्ट्रोनिक र प्लम्बिङको काम पूरा भएको छ।

नेपाल यातायात मजदुर सङ्घ, हुलाक सवारीचालक दमक नगर समितिले सिरक, डसना, सिरानी र तन्दा हस्तान्तरण गरेको छ। उक्त सामग्रीहरू दमक नगरपालिकाका नगरप्रमुख रामकुमार थापाले औपचारिक रूपमा ट्राफिक प्रहरीलाई हस्तान्तरण गर्नुभएको हो। नगरप्रमुखले आवश्यक अन्य सामग्री नगरपालिकाले उपलब्ध गराउने प्रतिबद्धता समेत जनाउनुभयो।

दमक ट्राफिक प्रहरी कार्यालयका प्रमुख विजय राईका अनुसार कार्यालयलाई सहज बस्ने वातावरण बनेलगत्तै सेवा सुचारु गर्दै ट्राफिक प्रहरी फिल्डमा खटिने छन्।