असाेज ६, दमक – हालै २३ र २४ गते भएको जेन्जी आन्दोलनका कारण इलाका प्रहरी कार्यालय र ट्राफिक प्रहरी कार्यालय जलेर ध्वस्त भएपछि दमकमा शान्ति सुरक्षा चुनौतीपूर्ण बनेको छ। प्रहरी प्रशासनको उपस्थितिमा कमी आएपछि स्थानीयवासीहरू स्वयं टोल गस्तीमा खटिन थालेका छन्।

दमक नगरपालिका वडा नम्बर ५ का त्रिवेणी टोलका राजेन्द्र ढकालका अनुसार हालको अवस्थाले टोलबासीलाई आफ्नो सुरक्षाको जिम्मा आफैं लिन बाध्य बनाएको छ। उहाँले भन्नुभयो, “जेन्जी आन्दोलनपछि सुरक्षाकर्मीको अभावमा हामी निरन्तर राति लौरो बोकेर टोलमा गस्ती गरिरहेका छौं।”

यस्तै आदर्श टोलका प्रकाश बस्नेतले पनि प्रहरी संरचनाहरू जलेपछि चोरी, डकैतीको डर बढेको बताए। “इलाका प्रहरी कार्यालय र ट्राफिक प्रहरी कार्यालय जलेर नष्ट भएपछि हामी आफैं गस्तीमा निस्कन बाध्य भएका हौं,” उहाँले भन्नुभयो।

नवीन टोलकी कमला पाण्डेले महिलाहरू समेत गस्तीमा सहभागी हुने गरेको जानकारी दिनुभयो। चाडपर्व नजिकिँदै गर्दा आपराधिक गतिविधि बढ्ने डरका कारण टोल गस्ती थप सशक्त बनाइएको त्रिवेणी टोलका कमल गैरेले बताए।

दमक नगरपालिकाका टोलहरू हाल सक्रिय रूपमा रातिको समयमा स्वयंसेवक गस्तीमा खटिएका छन्।स्थानीयवासीले प्रशासनलाई शीघ्र सुरक्षाकर्मी परिचालन गर्न आग्रह गरेका छन्।