दमक, २७ असोज । झापाको दमकस्थित लायन्स क्लब अफ दमक गोल्डले मानव उद्धार सेवा केन्द्र, दमकमा औषधि सहयोग गरेको छ। अभिभावकविहीन व्यक्तिहरू बसोबास गर्दै आएका सो सेवा केन्द्रमा क्लबका पदाधिकारीहरूले सम्बन्धित चिकित्सकको उपस्थितिमा स्वास्थ्य परीक्षण गराउनुका साथै डाक्टरको प्रिस्क्रिप्सनअनुसार करिब दुई महिनासम्म पुग्ने औषधिहरू प्रदान गरेका हुन्।
मानवीय सेवाको भावनाबाट प्रेरित उक्त कार्यक्रमको सहजीकरण लायन्स क्लब अफ दमक गोल्डका सम्पूर्ण पदाधिकारीहरू, डा. राकेश मेहता, डा. हेमराज गैरे र डा. राजेश श्रेष्ठलगायतले गरेका थिए।
कार्यक्रमका अवसरमा डा. हेमराज गैरे, डा. राकेश मेहता र डा. राजेश श्रेष्ठले आगामी दिनहरूमा पनि मानव उद्धार सेवा केन्द्रमा स्वास्थ्यसम्बन्धी आवश्यक सहयोग पुर्याउँदै मानवीय सेवामा निरन्तर हातेमालो गर्ने प्रतिबद्धता जनाएका छन्।
मानव उद्धार सेवा परिवारले लायन्स क्लब अफ दमक गोल्ड र चिकित्सक टोलीप्रति हार्दिक आभार व्यक्त गर्दै यस्ता सामाजिक र मानवीय सेवाका कार्यहरूले अभिभावकविहीन तथा असहाय व्यक्तिहरूको जीवनमा ठूलो सहजता ल्याउने विश्वास व्यक्त गरेको छ।
