दमक , मंसिर ९ / टिभिएसका दुई नयाँ मोडल आरटिआर १६० टुभी एफआई र रेयडर १२५ आइगो नेपालभरि सोमबारदेखि औपचारिक रूपमा सार्वजनिक गरिएको छ। दमक–५ स्थित टिभिएसको आधिकारिक बिक्रेता आरए इन्टरनेशनल ले दमक उद्योग वाणिज्य संघका अध्यक्ष गोपाल गुरागाईको प्रमुख आतिथ्यतामा दुवै मोडेलको लोकार्पण गरेको हो।
कार्यक्रममा प्रमुख अतिथि गुरागाईले नयाँ मोडेलहरू एफआई (फ्युल इन्जेक्सन) प्राणालीसहित मोडिफाइ भएर आएको हुँदा ग्राहकका लागि अझ मितव्ययी र भरपर्दो बन्ने विश्वास व्यक्त गर्दै प्रयोग गर्न सबैलाई सुझाव दिए।
आरए इन्टरनेशनलका बजार व्यवस्थापक बालचन्द्र कार्कीका अनुसार, पछिल्लोपटक कार्बुरेटरमा आधारित आरटिआर १६० टुभीमा एफआई प्रणालीसँगै एभीएस, डबल डिस्क ब्रेक, डिजिटल मिटर, ब्लुटुथ कनेक्टभिटी लगायत आधुनिक फिचर थपिएको छ। मोबाइलमार्फत बाइकको अवस्था जाँच गर्न सकिने सुविधा तथा ४५–५० किमिसम्म माइलेज दिने क्षमताले यो मोडेल ग्राहकमैत्री बन्ने उहाँको भनाइ छ। नयाँ आरटिआर १६० टुभी एफआई रातो, कालो र निलो गरी तीन रङमा उपलब्ध छ।
त्यस्तै, रेयडर १२५ आइगोमा डिजाइन सुधारसँगै चक्काको रङ परिवर्तन गरिएको हुँदा यो मोडेल झन् आकर्षक बनेको कम्पनीले जनाएको छ। डिजिटल मिटर, दुई वटा मोड र ६०–६५ किमिसम्म माइलेज यसको मुख्य विशेषता हुन्। बजारमा अहिले यो मोडेल कालो र खैरो गरी दुई रङमा उपलब्ध रहेको कार्कीले बताए। सिट मुनि रहेको सानो डिक्कीमा मोबाइल, बिलबुक लगायत सानातिना सामान राख्न सकिने सुविधा पनि समावेश गरिएको छ।
सोमबार सार्वजनिक गरिएका यी दुई मोडेलले नेपाली ग्राहकहरूको आवश्यकता र चाहनालाई पुरा गर्ने तथा बजारमा राम्रो प्रभाव पार्ने कम्पनीले विश्वास व्यक्त गरेको छ।
