दमक, झापा — दमक–१ मा रहेको लिटल स्कलर मन्टेश्वरीमा निःशुल्क दन्त परीक्षण शिविर सफलतापूर्वक सम्पन्न गरिएको छ। विद्यालयमा अध्ययनरत करिब २०० विद्यार्थी तथा अभिभावकहरूले शिविरमार्फत निःशुल्क दन्त परीक्षण गराएका छन्।
शिविरमा बालबालिकाको दन्त स्वास्थ्यको अवस्थाबारे विस्तृत परीक्षण गरिनुका साथै भविष्यमा अपनाउनुपर्ने दन्त सुरक्षा तथा सरसफाइबारे चिकित्सक टोलीले महत्वपूर्ण परामर्श प्रदान गरेको विद्यालयले जनाएको छ।
विद्यालयकी अभिभावक विपना खत्रीका अनुसार यस्तो निःशुल्क शिविर विद्यालयमै आयोजना हुँदा विद्यार्थीसँगै अभिभावकहरूले पनि प्रत्यक्ष रूपमा लाभ लिन पाएको अनुभव रहेको छ।
त्यस्तै, विद्यालयका संस्थापक प्रिन्सिपल देव ओझाले दन्त शिविरले विद्यार्थीहरूको दन्त स्वास्थ्य अवस्थाबारे अभिभावक र विद्यालय दुवैलाई आवश्यक जानकारी प्रदान गर्ने भएकाले दन्त रोगको प्रारम्भिक चरणमै उपचार सम्भव हुने बताए।
शिविरमा सहभागीहरूलाई थप उपचार आवश्यक परे २० प्रतिशतसम्म छुट प्रदान गरिएको ओम शान्ति अस्पतालका संचालक कमल गैरेले जानकारी दिए। ओम शान्ति अस्पतालले यसअघि पनि दमकका विभिन्न विद्यालय तथा समुदायमा दन्त तथा सामान्य स्वास्थ्यसम्बन्धी निःशुल्क परीक्षण गर्दै आएको छ।
