पुस २५, झापा / झापामा ‘प्रेसर कुकर बम’ राखिएको भन्दै त्रास फैलाउने घटनामा संलग्न व्यक्ति पक्राउ परेका छन्। प्रहरीको प्रारम्भिक अनुसन्धान अनुसार बम राखेर आतंक मच्चाएको आरोपमा सञ्जय भन्ने खगेन्द्र खरेललाई प्रहरीले पक्राउ गरेको हो।

कनकाई नगरपालिका–४ स्थित कनकाई पुल नजिक विस्फोटक पदार्थ राखी सर्वसाधारणमा आतंक फैलाएको आरोपमा ५५ वर्षीय खरेललाई नियन्त्रणमा लिइएको प्रहरीले जनाएको छ। उनी कनकाई नगरपालिका–८ का स्थायी बासिन्दा हुन्।

झापा प्रहरीका प्रवक्ता डीएसपी खगेन्द्रबहादुर खड्काका अनुसार खरेल यसअघि पनि पटक–पटक यस्तै प्रकृतिका घटनामा संलग्न भई पक्राउ परेका र सजाय भोगिसकेका व्यक्ति हुन्। घटनाबारे थप अनुसन्धान भइरहेको र कानुनी प्रक्रिया अघि बढाइएको प्रहरीले जनाएको छ।प्रहरीले यस्ता गतिविधिमा संलग्न जो–कोहीलाई कडा कारबाही गरिने चेतावनी दिँदै सर्वसाधारणलाई शंकास्पद गतिविधि देखिएमा तुरुन्त प्रहरीलाई जानकारी गराउन आग्रह गरेको छ।