पुष २५, दमक / झापाको दमक नगरपालिका–५ लालीगुराँस टोलमा पाँच वर्षीया बालिकाले लगाएको सुनको रिङ नेल कटरको प्रयोग गरी काटेर चोरी गर्ने समूहका ६ जनालाई प्रहरीले पक्राउ गरेको छ।
पुस २५ गते बिहीबार दिउँसो करिब ३ बजे भएको उक्त घटनामा संलग्न व्यक्तिहरूलाई आज पक्राउ गर्न प्रहरी सफल भएको हो। जिल्ला प्रहरी कार्यालय झापाका अनुसार सुमन लिम्बुको पाँच वर्षीया छोरी प्यारोन लिम्बु आफ्नै घरअगाडि बाटोमा खेलिरहेको अवस्थामा सो समूह प्र.१–०१–००१ ह ८३८५ नम्बरको सिटी सफारीमा आएर बालिकाले कानमा लगाएको सुनको रिङ नेल कटरले काटी चोरी गरी फरार भएका थिए।
प्रहरीले घटनामा संलग्न रहेको आरोपमा दमक नगरपालिका–८ का १८ वर्षीय संजय माझी, दमक–७ का १८ वर्षीय निश्चल विश्वकर्मा, दमक–६ का ३८ वर्षीय मेघराज मेहेत्तर तथा भारतको कलकत्ताका स्थायी बासिन्दा भई हाल दमक–६ मा बस्दै आएका ५३ वर्षीय रिटन दाससहित ६ जनालाई पक्राउ गरेको जनाएको छ। अन्य दुई जनाको विवरण अनुसन्धानका क्रममा खुलाइएको प्रहरीले बताएको छ।पक्राउ परेकाहरूमाथि चोरी मुद्दामा इलाका प्रहरी कार्यालय दमकमा राखी थप अनुसन्धान अघि बढाइएको जिल्ला प्रहरी कार्यालय झापाले जनाएको छ।
