पुष २६, दमक / झापा जिल्लाको दमकमा सिनियर तथा जुनियर आईटीएफ तेक्वान्दो च्याम्पियनसिप प्रतियोगिता आयोजना हुने भएको छ । प्रतियोगिता माघ २ र ३ गते दमक नगरपालिका–७ स्थित वडा कार्यालय परिसरभित्र सञ्चालन हुनेछ । निजी तथा सरकारी दुवै विद्यालयको सहभागिता रहने प्रतियोगितामा १७ वटा विद्यालय सहभागी हुने आयोजकले जनाएको छ । कार्यक्रम झापा जिल्ला आईटीएफ तेक्वान्दो सङ्घ र दमक नगर आईटीएफ तेक्वान्दो समितिको संयुक्त आयोजनामा हुन लागेको हो ।
आर्थिक सहयोगका रूपमा दमक नगर खेलकुद समिती तथा दमक नगरपालिका वडा नम्बर ७ बाट वार्षिक ५० हजार रुपैयाँ विनियोजन गरिएको आयोजकले जानकारी दिएको छ । प्रतियोगिता सञ्चालनका लागि अनुमानित खर्च १ लाख ६० हजार रुपैयाँ लाग्ने अनुमान गरिएको छ । प्रतियोगितामा विद्यालयस्तरमा प्रथम, द्वितीय र तृतीय हुने टोलीलाई ट्रफी, मेडल तथा प्रमाणपत्र प्रदान गरिनेछ । साथै उत्कृष्ट खेलाडी (महिला तथा पुरुष ), अनुशासित खेलाडी (महिला तथा पुरुष ) र अनुशासित विद्यालयलाई समेत ट्रफी, मेडल र प्रमाणपत्र प्रदान गरिनेछ ।
कार्यक्रमका प्रमुख अतिथि दमक नगरपालिकाका प्रमुख राम थापा रहने छन् भने विशिष्ट अतिथिमा दमक नगर खेलकुद समितिका अध्यक्ष भीम चम्लागाईं र वडा नम्बर ७ का अध्यक्ष भीमप्रसाद पौडेल रहनेछन् । झापा जिल्ला आईटीएफ तेक्वान्दो सङ्घको स्थापना २०७२ सालमा भएको हो । हाल कमल गाउँपालिका, शिवसताक्षी नगरपालिका, इलामको चुलाचुली गाउँपालिका लगायत झापा जिल्लाभर यसको शाखा विस्तार भइसकेको छ ।
झापा जिल्ला आईटीएफ तेक्वान्दो सङ्घका अध्यक्ष नवीन तामाङले शनिबार ल्याटे आर्ट क्याफेमा आयोजित एक कार्यक्रममा प्रतियोगिताबारे जानकारी गराउँदै खेलकुदमार्फत युवालाई लागूऔषधको कुलतबाट जोगाउँदै स्वस्थ गतिविधितर्फ आकर्षित गर्ने उद्देश्यले प्रतियोगिता आयोजना गरिएको बताए । दमक नगरपालिकाले सहयोग गरिरहेको भए पनि खेलकुदको थप प्रवर्द्धनका लागि अझै सहयोग आवश्यक रहेको तामाङको भनाइ छ । प्रतियोगितामा आईटीएफ तेक्वान्दो सङ्घका राष्ट्रिय रेफ्री अनुप श्रेष्ठ र मनोज खटिवडा, आईटीएफ तेक्वान्दोका राष्ट्रिय स्वर्ण पदक विजेता रोशन मगरलगायत खेलाडी तथा खेलप्रेमीहरूको उपस्थिति रहने छ ।
