माघ ३, दमक / झापाको दमकमा शुक्रबारदेखि सुरु भएको प्रथम दमक नगर जुनियर तथा सिनियर आईटीएफ तेक्वान्दो च्याम्पियनसिप शनिबार सफलतापूर्वक सम्पन्न भएको छ। स्कुल जुनियर र सिनियर तर्फका खेलहरू २ र ३ गते सञ्चालन भई उत्कृष्ट खेलाडी तथा विद्यालयहरूलाई पुरस्कार वितरण गरिएको हो।
समापन तथा पुरस्कार वितरण कार्यक्रममा प्रमुख अतिथिका रूपमा दमक नगरपालिकाका नगर प्रमुख राम थापा उपस्थित हुनुहुन्थ्यो। विशिष्ट अतिथिहरूमा दमक वडा नं. ७ का वडाध्यक्ष भिम प्रसाद पौडेल, झापा जिल्ला खेलकुद विकास समितिका कार्यालय प्रमुख विष्णु नेम्बाङ, दमक नगर खेलकुद समितिका अध्यक्ष भिम चम्लागाईं लगायत अन्य अतिथिहरूको सहभागिता रहेको थियो। सम्पूर्ण खेल तथा कार्यक्रमहरू सभ्य र भव्य रूपमा सम्पन्न गरिएको आयोजकले जनाएको छ।
प्रतियोगितामा विद्यालयतर्फको नतिजा यस प्रकार रहेको छः
प्रथम विद्यालय: चुलाचुली बोर्डिङ स्कुल – ७ स्वर्ण, २ कास्य
द्वितीय विद्यालय: सिद्धार्थ बोर्डिङ स्कुल – ६ स्वर्ण, ४ रजत, २ कास्य
तृतीय विद्यालय: इन्स्पायर बोर्डिङ स्कुल – ६ स्वर्ण, ४ कास्य
व्यक्तिगत उत्कृष्टतर्फ महिला उत्कृष्ट खेलाडी चुलाचुली बोर्डिङ स्कुलकी दीक्षा तामाङ र पुरुष उत्कृष्ट खेलाडी सोही विद्यालयका सुसान्त लिम्बू घोषित भए। अनुशासित विद्यालय को उपाधि सेन्कु पब्लिक स्कुल ले प्राप्त गर्यो।
कार्यक्रमको सञ्चालन बिमल जंग शंकर ले गर्नुभएको थियो भने कार्यक्रम झापा जिल्ला आईटीएफ तेक्वान्दो संघका अध्यक्ष नवीन तामाङ को अध्यक्षतामा सम्पन्न भएको हो।
झापा जिल्ला आईटीएफ तेक्वान्दो संघको स्थापना २०७२ सालमा भएको हो। हाल कमल गाउँपालिका, शिवसताक्षी नगरपालिका, इलामको चुलाचुली गाउँपालिका लगायत झापा जिल्लाभर संघका शाखाहरू विस्तार भइसकेका छन्।
