दमकमा सञ्चालित सूर्यदर्शन बचत तथा ऋण सहकारी संस्थाले १७ औं बार्षिक साधारण सभा अन्तर्गतका कार्यक्रमहरु शुक्रबारदेखि शुरु गरेको छ । संस्थाको आफ्नै सभाहलमा आयोजित कार्यक्रमबीच झापा जिल्ला सहकारी संघका अध्यक्ष प्रेमकुमार कोइरालाले साधारण सभाको उदघाटन गरे ।
अध्यक्ष कोइरालाले झापाका सहकारी संस्थाहरु मध्ये कारोबारका आधारमा सूर्यदर्शन सहकारी जिल्लाकै पाँचौं ठुलो सहकारी संस्थाका रुपमा रहेको उल्लेख गरे । उनले शेयर सदस्यहरुले संस्थाका सम्पूर्ण कार्यक्रमहरुको समीक्षा र भावी योजनाहरुको तर्जुमा गर्ने थलोनै साधारण सभा भएकाले यसलाई महत्वसाथ लिएर अधिकतम उपयोग गर्न सुझाव दिए ।
सूर्यदर्शन सहकारीका अध्यक्ष टिकाराज सापकोटाको अध्यक्षतामा भएको साधारण सभाको उदघाटनको अवसर पारेर संस्थाको स्थापनाकालदेखि नै कार्यरत हालै मात्रै अवकाश प्राप्त कर्मचारी गोपाल पौडेललाई नगद र सम्मान पत्रबाट सम्मान गरिएको थियो । त्यस्तै संस्थाले आर्थिक बर्ष २०८२/०८३ को सर्वोत्कृष्ट कर्मचारीका रुपमा मेषराज आचार्यलाई सम्मान गरिएको छ ।
त्यसैगरी संस्थाले गत आर्थिक बर्षमा कार्यालय खुलेका सबै दिन नियमित रुपमा हाजिर भइ अनुशासित र कर्तव्यनिष्ट भएर आफ्नो आफ्नो जिम्मेवारी पुरा गर्ने आठ जना कर्मचारीलाई पनि नगद पुरस्कारसहित सम्मान गरेको छ । संस्थाका कर्मचारीहरुलाई अध्यक्ष सापकोटा, प्रमुख अतिथी कोइरालासहित अतिथीहरुले सम्मान गरेका छन् । सो अवसरमा अध्यक्ष सापकोटा र लेखा समिति संयोजक डिल्लीराम मुखियाले संस्थाको बार्षिक लेखा सुपरिवेक्षण प्रतिवेदन प्रस्तुत गरेका छन् ।
साधारण सभा उदघाटनमा बार्षिक प्रतिवेदन प्रस्तुत गर्दै संस्थाका अध्यक्ष टिकाराज सापकोटाले २०८३ को असार मसान्त सम्ममा संस्थाले झण्डै डेढ अर्ब रुपैयाँ लगानी गरेको जानकारी दिए । प्रतिवेदनमा जनाइए अनुसार असार मसान्त सम्ममा कूल १ अर्ब ४६ करोड ८७ लाख रुपैयाँ कर्जा लगानी रहेको छ ।
कर्जाको ब्याजदर समय सापेक्ष परिवर्तन गरिएको, लगानी पूर्व गरिने अध्ययन ५ सी विश्लेषण तथा ऋण सदुपयोगितालाई प्रभावकारी बनाई उत्पादनशील क्षेत्रमा प्रति शेयर सदस्य बढीमा १ करोड रुपैयाँ सम्म लगानी गर्ने नीति अवलम्बन गरिएको पनि उल्लेख छ । संस्थामा बाह्य कर्जा तथा सापटी करीब १० करोड रुपैयाँ रहेको र चालू आर्थिक बर्षको अन्त्य सम्ममा सबै बाह्य कर्जा कम गर्दै लगिने नीति पनि अवलम्बन गरिएको अध्यक्ष सापकोटाद्धारा प्रस्तुत प्रतिवेदनमा उल्लेख छ ।
संस्थाले कर्जा असुलीका क्रममा आफ्नो नाममा कायम गरिएका गैर बैकिङ सम्पत्ती (धितो) विक्रीका लागि प्रकृया अघि बढाउने प्रस्ताव पनि अघि सारेको छ ।
संस्थाको चुक्ता शेयर पुँजी गत असार मसान्त सम्ममा १२ करोड ३३ लाख २५ हजार रुपैयाँ पुगेको छ । संस्थाले नयाँ शेयर सदस्यलाई न्यूनतम १० हजार शेयर खरिद गर्न र पुराना शेयर सदस्यलाई शेयर थप गर्न प्रोत्साहन गरिने नीति संस्थाले लिएको छ । त्यस्तै संस्थाको साधारण जगेडा कोषमा ११ करोड ४७ लाख ६९ हजार रुपैयाँ र अन्य कोषहरु तर्फ ८४ लाख ९९ हजार रुपैयाँसहित १२ करोड ३२ लाख रुपैयाँ पुगेको प्रतिवेदनमा उल्लेख छ ।
