दमक । ज्येष्ठ नागरिक सम्मान प्रतिष्ठान नेपाल, शाखा समिति दमक–१० को सातौँ वार्षिक साधारणसभा तथा ज्येष्ठ बुवा सम्मान कार्यक्रम सम्पन्न भएको छ। कुशे औँसीको अवसर पारेर आयोजित कार्यक्रममा वडाभित्रका ८० वर्षभन्दा माथिका ज्येष्ठ बुबाहरूलाई नगदसहित सम्मान गरिएको हो।
शाखा समिति दमक–१० का उपाध्यक्ष पुण्यप्रसाद दाहालको अध्यक्षता तथा दमक–१० का वडाध्यक्ष राजेन्द्र भण्डारीको प्रमुख आतिथ्यमा सम्पन्न कार्यक्रममा ज्येष्ठ नागरिक सम्मान प्रतिष्ठान नेपालका केन्द्रीय अध्यक्ष दुर्गाप्रसाद पौडेल विशिष्ट अतिथिका रूपमा सहभागी हुनुभएको थियो। साथै वडा सदस्य भूमिका आचार्यको समेत आतिथ्यता रहेको थियो।
प्रतिष्ठानका अनुसार दमक–१० मा ८० वर्षभन्दा माथिका ५३ जना ज्येष्ठ बुबाहरू रहेकामा कार्यक्रममा २६ जना उपस्थित हुनुभएको थियो। उपस्थित ज्येष्ठ बुबाहरूलाई नगदसहित सम्मान गरिएको आयोजकले जनाएको छ।
कार्यक्रममा सहभागी हुन नसक्नुभएका बाँकी ज्येष्ठ बुबाहरूलाई भने घरमै पुगेर सम्मान गरिने शाखा समितिले जानकारी दिएको छ। कार्यक्रमका वक्ताहरूले ज्येष्ठ नागरिकको सम्मान, संरक्षण र अनुभवको कदर गर्दै उनीहरूको योगदानलाई समाजले सधैं स्मरण गर्नुपर्नेमा जोड दिएका थिए।
