Blog

कार्तिक १९ , दमक / पूर्वराजा ज्ञानेन्द्र वीरविक्रम शाह बुधबार झापाको भद्रपुर विमानस्थल हुँदै दमक पुगेका छन्। बुद्ध एयरको उडान BHA955 (काठमाडौँ–भद्रपुर) मार्फत पूर्वराजा शाह, श्रीमती कोमल राज्यलक्ष्मी देवी शाह, छोरी प्रेरणा राज्यलक्ष्मी देवी शाह सहित सात सदस्यीय टोली झापामा आइपुगेका हुन्।

भद्रपुर विमानस्थलमा उनीहरूको स्वागत हल्दिबारि गाउँपालिकाका अध्यक्ष रबिन्द्र लिङ्देन, भद्रपुर नगरपालिकाकी उपप्रमुख राधा कार्की सहित करिब ५० जनाको उपस्थितिमा गरिएको थियो।

स्वागत कार्यक्रमपछि पूर्वराजा शाहसहितको टोली बा २१ च ७३१८ नम्बरको सवारी साधनमार्फत दमकतर्फ प्रस्थान गरेको थियो। उनीहरू बेलुकी ४:३० बजे दमक नगरपालिका–९ स्थित हिमालयन महालक्ष्मी टि स्टेट मिनि दरबार पुगेका छन्।

दमक आगमनका क्रममा दमक नगरपालिकाका मेयर रामकुमार थापा, दमक उद्योग वाणिज्य संघका वरिष्ठ उपाध्यक्ष राजु खड्का, राप्रपा दमक नगर अध्यक्ष हेम सुवेदी लगायतका नेताहरु तथा कार्यकर्ताहरू उपस्थित रहेकाे थिए।

पूर्वराजा शाह केही दिनसम्म दमक नगरपालिका–९ को हिमालयन महालक्ष्मी टि स्टेट मिनि दरबारमा बस्ने कार्यक्रम रहेको बताइएको छ।

इटहरी, कार्तिक १७ – करुणा फाउन्डेशन नेपालले सामाजिक विकास मन्त्रालय, कोशी प्रदेश र सम्बन्धित स्थानीय सरकारहरूको साझेदारीमा आज औपचारिक रूपमा कृत्रिम हात वितरण कार्यक्रमको शुभारम्भ गरेको छ।

अपाङ्गता निवारण र पुनःस्थापनाको लक्ष्यसहित कोशी प्रदेशका सबै १३७ स्थानीय तहमा सञ्चालन हुने यस कार्यक्रमको उद्घाटन प्रदेशका आन्तरिक मामिला तथा कानुन मन्त्री रेवती रमन भण्डारीले गर्नुभयो। “द ह्यान्ड प्रोजेक्ट”सँगको सहकार्यमा सञ्चालन गरिएको यो अभियान अन्तर्गत अपाङ्गता भएका व्यक्तिहरूका लागि निःशुल्क रूपमा कृत्रिम हातको मापन, जडान र प्रयोग सम्बन्धी तालिम प्रदान गरिँदैछ।

इटहरीमा सञ्चालन भइरहेको यो विशेष शिविर नोभेम्बर ३ देखि १२ तारिखसम्म चल्नेछ। उक्त अवधिमा दैनिक २० देखि २५ जना लाभग्राहीलाई सेवा उपलब्ध गराइने कार्यक्रमका निर्देशक योगेन्द्र गिरीले जानकारी दिनुभयो।

जर्मनी, न्यूजिल्याण्ड र युगाण्डाबाट आएका प्राविधिक टोलीहरूले मापन, जडान तथा तालिम सत्रहरू सञ्चालन गरिरहेका छन्। यो अभियान अन्तर्गत कोशी प्रदेशका १३ जिल्लाका २०४ जनालाई हलुका, कार्यात्मक र सौन्दर्ययुक्त कृत्रिम हात निःशुल्क रूपमा वितरण गरिनेछ।

उद्घाटन समारोहमा पहिलो समूहका केही लाभग्राहीहरूले आफ्ना कृत्रिम हात प्राप्त गरेका थिए। सो अवसरमा मन्त्री भण्डारीले अपाङ्गता भएका व्यक्तिहरूले सहायक उपकरण प्राप्त गर्ने अधिकार रहेको बताउँदै, लाभग्राहीहरूलाई दैनिक जीवनमा कृत्रिम हात प्रयोग गर्न निरन्तर अभ्यास गर्न आग्रह गर्नुभयो। उहाँले प्रदेश सरकार अपाङ्गता अधिकार, निवारण र पुनःस्थापनाका पक्षमा प्रतिबद्ध रहेको पनि पुनः पुष्टि गर्नुभयो।

कार्यक्रममा स्थानीय सरकारका प्रतिनिधि, करुणा नेपालका पदाधिकारी, राष्ट्रिय अपाङ्ग महासंघका प्रतिनिधि, लाभग्राहीका परिवार, सञ्चारकर्मी तथा अन्तर्राष्ट्रिय विज्ञहरूको सहभागिता रहेको थियो।

“द ह्यान्ड प्रोजेक्ट” टोलीमा संस्थापक तथा निर्देशक क्रिस गली, ग्रोथ रोबर्ट गली, इसाक माकुला, र कामान्जी ब्लेसल समेत सहभागी थिए। कार्यक्रमका निर्देशक योगेन्द्र गिरीले भने, “यो अभियानको उद्देश्य केवल कृत्रिम हात वितरण गर्नु मात्र होइन, अपाङ्गता भएका व्यक्तिहरूलाई आत्मनिर्भर, सम्मानित र उत्पादक जीवनमा पुनःस्थापित गर्नु हो।”

कार्तिक १६, झापा / झापाको शिवशताक्षी नगरपालिका–१० का ३३ वर्षीय सरोज शर्माको हत्या प्रकरणमा संलग्न दुई जनालाई प्रहरीले सार्वजनिक गरेको छ।

जिल्ला प्रहरी कार्यालय झापामा आइतबार आयोजित पत्रकार सम्मेलनमा प्रहरी नायव उपरीक्षक (डीएसपी) खगेन्द्रबहादुर खड्काले घटनामा संलग्न स्थानीय २७ वर्षीय सुनिल साह र २३ वर्षीय राहुल साहलाई पक्राउ गरिएको जानकारी दिए। साथै, घटनामा संलग्न अर्का एक जना भारतीय नागरिक फरार रहेको र उनको खोजी भइरहेको प्रहरीले जनाएको छ।

प्रहरीका अनुसार काठमाडौंमा बस्दै आएका सरोज शर्माले सस्तो दरमा सुन किन्ने र परिचितहरूलाई पनि किनिदिने प्रस्ताव गर्दै आएका थिए। यही बहानामा सुनिल साहसँग उनको चिनजान भएको थियो। प्रारम्भिक अनुसन्धानअनुसार, सुनिल र राहुलले शर्मासँग भएको पैसा लुट्ने उद्देश्यले योजनाबद्ध रूपमा उनको हत्या गरेका हुन्।

प्रहरीको भनाइमा, गत कात्तिक ९ गते उनीहरूले “सुन ल्याएका छौं, देखाउँछौं” भन्दै शर्मालाई अर्जुनधारा नगरपालिका–४ स्थित दहिझोडा सामुदायिक वनमा लगेका थिए। त्यही ठाउँमा उनले टाउकोमा हथौडा प्रहार गरी हत्या गरिएको बताइएको छ। त्यसपछि शवलाई झापा गाउँपालिका–५, हुलाकी मार्गस्थित बिरिङ खोलाको पुलमुनि गाडिएको थियो।

शर्माकै सवारी साधन बा.प्र.०१–३० च ७१९४ नम्बरको गाडी प्रयोग गरी शव पु¥याइएको र पछि त्यस गाडीलाई जलाएर मेचीनगर–१३, निचाझोडा सिमसार क्षेत्रमा फालिएको प्रहरी अनुसन्धानबाट खुलेको छ।कात्तिक ९ गतेदेखि बेपत्ता रहेका शर्माको खोजीपछि कात्तिक १३ गते उनको जलिरहेको गाडी फेला परेको र कात्तिक १५ गते राति १ बजे बिरिङ खोलाको पुलमुनि उनको शव भेटिएको प्रहरीले जनाएको छ।

पक्राउ परेका सुनिल र राहुल नातामा मामा–भान्जा हुन्। उनीहरूले प्रारम्भिक सोधपुछका क्रममा अपराध स्वीकार गरेका छन्।शर्माको शव पोष्टमार्टमका लागि बीपी कोइराला स्वास्थ्य विज्ञान प्रतिष्ठान, धरान पठाइएको छ। पक्राउ परेकामाथि अपहरण, शरीर बन्धक, आपराधिक उपद्रव र ज्यान सम्बन्धी कसुरमा जिल्ला अदालत झापाबाट ७ दिनको म्याद लिएर थप अनुसन्धान भइरहेको डीएसपी खड्काले बताए।

कार्तिक १६ , कमल / कमल गाउँपालिकाले “गाउँमै आधुनिक स्वास्थ्य सेवा” अभियान अन्तर्गत कमल नगर अस्पतालमा आईतवार नियमित दन्त सेवा तथा खोप सेवा कार्यक्रम सफलतापूर्वक सम्पन्न गरेको छ। गाउँका नागरिकलाई सहज, सुलभ र गुणस्तरीय स्वास्थ्य सुविधा उपलब्ध गराउने उद्देश्यका साथ सञ्चालन गरिएको यस सेवाले स्थानीय वासीको विश्वास र सन्तुष्टि दुवै हासिल गरेको छ।

प्रत्येक हप्ताको आइतबार र बिहीवार सञ्चालन हुने दन्त सेवा यसपटक पनि डा. हेमराज गैरे, डा. सायरा ढकाल तथा दमक हस्पिटल एण्ड रिसर्च सेन्टर, दमकको प्राविधिक टोलीको सहकार्यमा सम्पन्न भयो।

दमक हस्पिटल एण्ड रिसर्च सेन्टर लामो समयदेखि स्वास्थ्य बिमा कार्यक्रम सहित गुणस्तरीय उपचारका लागि परिचित संस्था हो।
कमल गाउँपालिका अध्यक्ष श्री हुकुम सिंह राईको पहलमा अस्पतालमा अत्याधुनिक डेन्टल चेयर र आधुनिक उपकरण सहितको उपचार सेवा सुरु गरिएको हो। यसले गाउँका बासिन्दालाई दन्त उपचारका लागि शहर धाउनुपर्ने बाध्यता घटाएको छ।

अस्पतालका मेडिकल सुपरिटेन्डेन्ट डा. फुलकका अनुसार, सेवाको सुरुवातसँगै बिरामीहरूको आगमन उल्लेखनीय रूपमा बढेको र सेवाग्राही अत्यन्त सन्तुष्ट रहेका छन्। दन्त विशेषज्ञ डा. हेमराज गैरेले भने — “शहरमा जस्तै गुणस्तरीय उपचार अब गाउँमै सम्भव भएको छ, यो स्थानीय सरकारको ठुलो उपलब्धि हो।”

यसैदिन नियमित खोप सेवा कार्यक्रम पनि सफलतापूर्वक सम्पन्न भएको छ। कार्यक्रममा बालबालिका र गर्भवती महिलाहरूलाई आवश्यक खोपका मात्रा वितरण गरिएको थियो। खोप कार्यक्रमले मातृ–शिशु स्वास्थ्य सुधारमा उल्लेखनीय योगदान दिँदै आएको छ। वडा अध्यक्ष अशोक सुब्बाका अनुसार, नियमित खोप सेवाले बालबालिकामा रोग प्रतिरोधात्मक क्षमता बढाएको र मातृ स्वास्थ्यमा पनि सकारात्मक सुधार ल्याएको छ।

गाउँपालिकाका अध्यक्ष हुकुम सिंह राईको नेतृत्वमा स्वास्थ्य सेवा सुदृढीकरणको अभियान तीव्र गतिमा अघि बढिरहेको छ। उनको पहलमा स्वास्थ्य बिमा कार्यक्रम, डेन्टल चेयर, ल्याब उपकरण, डाक्टर र नर्सिङ सेवा लगायतका आधुनिक स्वास्थ्य सुविधाहरू विस्तार भइरहेका छन्। स्थानीय बासिन्दाहरूले पनि अस्पतालको सेवा र व्यवस्थापनप्रति सन्तुष्टि व्यक्त गर्दै भने — “अब दाँतको उपचार वा खोपका लागि टाढा जानु पर्दैन, हाम्रै गाउँमा यस्तो राम्रो सेवा पाउँदा गर्व लाग्छ।”

कमल नगर अस्पतालले “गाउँमै विशेषज्ञ सेवा, गाउँकै विश्वास” भन्ने नारालाई व्यवहारमा उतार्दै आएको छ। दन्त सेवा, खोप कार्यक्रम र अन्य स्वास्थ्य अभियानहरूको निरन्तरताले कमल गाउँपालिकाको स्वास्थ्य क्षेत्रलाई नयाँ उचाइमा पुर्‍याएको छ । अध्यक्ष हुकुम सिंह राईको दृष्टि, अस्पताल व्यवस्थापनको सक्रियता र स्वास्थ्यकर्मीहरूको समर्पणले कमल नगर अस्पताललाई गाउँकै गर्व बनाएको छ।

कार्तिक १६ , गौरादह / झापाको गौरादहस्थित एक होटलबाट १६ जना जुवा खेलिरहेको अवस्थामा पक्राउ परेका छन् ।

गएराति गौरादह नगरपालिका ५ स्थित स्कूलचौन बजारमा रहेको सत्कार होटलमा जुवा तास खेलाइरहेको गोप्य सूचनाका आधारमा प्रहरीले छापा मारेको थियो । प्रहरीले छापा मार्दा होटल सञ्चालकसहित १६ जना पक्राउ परेका हुन् । पक्राउ पर्नेमा रास्वपा नगर सभापति जगत अधिकारीसहित छन् । उनीहरूको साथबाट प्रहरीले एक लाख ६ हजार ६ सय २० रूपैयाँ समेत बरामद गरेको छ ।

पक्राउ पर्नेमध्ये विनोद अधिकारी गत भाद्र २४ गतेको तोडफोड र आगजनीमा पनि संलग्न भएका व्यक्ति रहेको प्रहरीले जनाएको छ । यसैगरी, गौरादह ४ र रास्वपा वडा सभापति युवराज खड्का पनि पक्राउ परेका छन् । यस्तै, भरत कार्की, हृदय सुवेदी, टंक बराल (सुन व्यवसायी), राम फुयाँल, केदार मगर, नवराज भट्टराई, रोशन खत्री समेत पक्राउ परेका छन् ।

यसैगरी, विनोद अधिकारी, दुर्गा पौडेल, मकर अधिकारी, अशोक काफ्ले, अर्जुन श्रेष्ठ, सुदिप चेम्जुङ र दिलबहादुर मगर समेत पक्राउ परेका प्रहरीले जनाएको छ ।

अनु लिम्बु – कार्तिक १५ , झापा / झापाको बिर्तामोड नगरपालिका वडा नम्बर ५ स्थित कृषि थोक रोडबाट नेपाल कम्युनिस्ट पार्टी (बिप्लव) समुह जिल्ला समिति झापाको आयोजनामा शनिबार मसाल जुलुस प्रदर्शन गरिएको छ।

पार्टीका झापा जिल्ला इन्चार्ज सुमन सिंह पौडेलको नेतृत्वमा जिल्ला सचिव संजय राईसहित करिब ४० देखि ५० जनासम्म कार्यकर्ताहरूको उपस्थितिमा विभिन्न नारासहित मसाल जुलुस निकालिएको हो।

मसाल जुलुस कृषि थोक रोडबाट सुरु भएर मुक्ति चोकसम्म पुगेको र त्यहाँ कोणसभा गरी कार्यक्रम सम्पन्न गरिएको बताइएको छ।

कार्यक्रमका क्रममा कार्यकर्ताहरूले “देशद्रोही होसियार”, “दलाल एएनजीओ खारेज गर”, “युवाहरूलाई रोजगारीको व्यवस्था गर”, “सर्वपक्षीय अन्तरिम सरकार गठन गर” लगायतका नारा लागेका थिए।

कोणसभामा बोल्ने वक्ताहरूले हालको प्रधानमन्त्री सुशीला कार्की नेतृत्वको सरकार विदेशी फाउन्डेसनको प्रभावमा चलिरहेको आरोप लगाउँदै त्यस सरकारलाई खारेज गर्नुपर्ने धारणा व्यक्त गरेका थिए।

कार्तिक १५ झापा, दमक / नेकपा एमालेले आज (शनिबार) झापाको दमकमा आफ्ना जनसंगठनहरूको सहभागितामा मोटरसाइकल र्‍याली सम्पन्न गरेको छ।

संविधानको रक्षा, संसद् पुनःस्थापना लगायतका मागहरूलाई समर्थन गर्दै नेकपा एमाले सम्बध्द जनसंगठन संयन्त्रकाे आयोजनामा भएको उक्त र्‍यालीमा पार्टीका युवा, महिला, सर्वसाधारण, कार्यकर्ता र नेताहरू सहभागी भएका थिए। निरन्तर परेको वर्षाको बीचमा पनि सहभागीहरू उत्साहका साथ र्‍यालीमा सहभागी भएका थिए।

दमक–५ स्थित गोरखा डिपार्टमेन्ट स्टोरबाट सुरु भएको र्‍याली सेतुमारी हाइवे रोड हुँदै पखेटे चोक, आम्दा रोड, मदनडाँगी सडक, फाल्गुनन्द चोक हुँदै गणतन्त्र चोकमा पुगेको थियो, जहाँ र्‍याली कोणसभामा परिणत भएको थियो।

एमाले दमक नगर कमिटीका अध्यक्ष राम पौडेलले देश गलत दिशामा गएको र संसद् पुनःस्थापना गरेर मात्र मुलुकलाई स्थिरता र प्रगतिको बाटोमा ल्याउन सकिने बताउनुभयो। उहाँले भदौ २३ र २४ गतेको जेन्जी आन्दोलनपछि देखिएको राजनीतिक अस्थिरता देशकै हितविपरीत भएको बताउनुभयो।

कोणसभालाई सम्बोधन गर्दै एमाले कोशी प्रदेश कमिटी सदस्य सुशिल राईले देशमा शान्ति–सुरक्षाको अभाव रहेको, कैदीबन्दी फरार रहेका, लुटिएका हतियार फिर्ता नभएका र आगामी चुनावको वातावरण समेत तयार नभएको आरोप लगाउनुभयो।

राईले वर्तमान शुसिला कार्की नेतृत्वको सरकारले निष्पक्ष वातावरण बनायो भने एमाले चुनावबाट कहिल्यै नभाग्ने स्पष्ट पार्नुभयो। दमकमा आयोजित यो मोटरसाइकल र्‍यालीमा सहभागीहरूको उल्लेख्य भीडले पार्टीप्रतिको समर्थन झल्काएको देखिएको थियो।