उर्लाबारी ४ स्थित वशिष्ठ रिसोर्ट नजिक आज बिहान भएको सवारी दुर्घटनामा एक जना मोटरसाइकल चालक घाइते भएका छन्।
पश्चिमबाट पूर्वतर्फ आउँदै गरेको प्रदेश ०१–०२–०५१ प नम्बरको मोटरसाइकललाई पूर्वबाट पश्चिमतर्फ जाँदै गरेको रातो बसले ठक्कर दिएको प्रहरीले जनाएको छ। घाइते मोटरसाइकल चालकको पहिचान खुल्न बाँकी रहेको छ। उनलाई तत्कालै उद्धार गरी उर्लाबारी–५ स्थित अरनिको अस्पताल लगिएको छ।
ठक्कर दिने रातो बस भने दुर्घटनापछि फरार भएको र घटनाबारे अनुसन्धान जारी रहेको इलाका प्रहरी कार्यालय उर्लाबारीले जनाएको छ।
दमक, २४ साउन–किराँत राई यायोख्याको ३८औं स्थापना दिवसको अवसर पारेर झापाबाट एसइई उर्तिण गर्नुहुने राई विद्यार्थींहरुलाई पुरस्कृत गरिएको छ ।
किराँत राई यायोख्या झापाले यसवर्ष झापाबाट सामुदायीक तथा निजी विद्यालयबाट माध्यमिक शिक्षा परिषद (एसइई) उर्तििण गर्नुहुने विद्यार्थीहरुलाई नदगसहित पुरस्कृत गरिएको हो ।
दमकस्थित किराँत भवनमा आयोजित कार्यक्रममा एसइई उर्तिण गर्नुहुने निजी तथा सामुदायीक विद्यालयका विद्यार्थीहरुलाई खादा ओढाएर नगदसहित प्रमाणप वितरण गरिएको थियो ।
यायोख्या झापाका अध्यक्ष गणेश राईको अध्यक्षतामा र यायोख्या केन्द्रीय सदस्य इन्द्रमान चाम्लिङ राईको प्रमुख आतिथ्यतामा सो कार्यक्रम भएको हो । झापाका पूर्व सचिव दिपेनबाला राई, किराँत राई पत्रकार संघ झापाका पूर्व अध्यक्ष अनिलदेब राई, किराँत याक्थुम चुम्लुङ दमक नगर अध्यक्ष देबेन्द्र चेम्जोङ लगायतको उपस्थिती थियो ।
कार्यक्रममा कार्यक्रममा यायोख्या केन्द्रीय सदस्य एबम् प्रमुख अतिथि इन्द्रमान चाम्लिङ राई, पहिचानको आन्दोलनका अगुवा, याक्थुम भाषाका मुन्धुमी गायक ब्रबिन शेर्मा, किराँत राई यायोख्या दमक नगर समिति अध्यक्ष बासुदेब राई, किराँत राई विद्यार्थी संघ झापाका अध्यक्ष मिलन रुम्दाली राईले शुभकामना मन्तव्य राख्नुभएको थियो ।
यायोख्या झापाका सदस्य गौरीमान चाम्लिङ राईले स्वागत मन्तव्य र यायोक्खा झापााका सहसचिव शन्देश राईले कार्यक्रमको सञ्चालन गर्नुभएको थियो ।
साउन २४ , दमक / हिन्दू धर्मावलम्बीहरूको पवित्र पर्व जनै पूर्णिमा अर्थात ऋषितर्पणी आज नयाँ जनै धारण गर्नुका साथै रक्षा–बन्धन गरी धुमधामसँग मनाइँदैछ ।
तागाधारीहरूले आजका दिन बिहानै नजिकैको नदी, तलाउ तथा कुण्डमा स्नान गरी आफ्ना गुरुबाट मन्त्रिएको जनै धारण गर्ने गर्दछन् । हिन्दू धर्मशास्त्रअनुसार जनैलाई ब्रम्हासूत्र अर्थात ज्ञानको धागो पनि भनिन्छ । जनैका दुई शिखामध्ये एउटा शिखामा रहेका तीन डोरालाई ब्रम्हा, विष्णु र महेश्वर तथा अर्को शिखाको डोरालाई कर्म, उपासना र ज्ञानका तीन योग मानिन्छ । आज जनै तथा राखी बाध्नाले देव ऋण, ऋषी ऋण र पितृ ऋणबाट मुक्त भइने तथा जनैले मानिसमा बल, बुद्धि र तेज प्रदान गर्छ भन्ने विश्वास रहिआएको छ ।
आजका दिन नाडीमा मन्त्रिएको डोरी बाँधेर रक्षाबन्धन पनि गरिन्छ । यस दिन विशेष गरी तागाधारीहरुबाट सप्तऋषि गौतम, भरद्वाज, विश्वामित्र, जमदग्नि, बशिष्ठ, कश्यप र अत्रिलाई तर्पण दिने भएकाले यस पर्वलाई ‘ऋषि तर्पणी’ समेत भन्ने गरिन्छ ।
तराई क्षेत्रमा दिदीबहिनीले आफ्ना दाजुभाइका नाडिमा दीर्घायु तथा सुस्वास्थ्यको कामना गर्दै स्नेहको प्रतीक ‘राखी’ बाँधिदिने चलन छ । आजै विभिन्न नौ प्रकारका गुडागुडी मिसाएर पकाइएको क्वाँटी खाने गरिन्छ । क्वाँटी खानाले शरीरमा रोग नलाग्ने, पेट सफा हुने र वर्षातका कारण चिसो भएको शरीरमा तापसञ्चार हुने विश्वास गरिन्छ । नेवारी समुदायले भने आजका दिन ‘गुन्हु पुन्ही’ मनाउने प्रचलन छ ।
उपत्यकाका किसानहरुले आफ्ना खेतमा गएर भ्यागुता पूजा गरेर भात खुवाउने गर्दछन् । ऋषितर्पणीका अवसरमा काठमाडौँको पशुपतिनाथ, पाटनको कुम्भेश्वर, रसुवाको गोसाइँकुण्ड, जनकपुरको गंगासागर तथा धनुषसागर, जुम्लाको त्रिवेणीलगायतका स्थानमा भक्तजनहरूको घुइँचो लागेको छ ।
दमक , २३ साउन । नेपाली कांग्रेसको भातृ संगठन नेपाल किसान महासंघ कोशी प्रदेश समितिको अध्यक्षमा पुनः राजेन्द्र भट्टराई निर्वाचित भएका छन् । दमक निवासी भट्टराई यसअघि महासघको तदर्थ समितिका अध्यक्षको जिम्मेवारी सम्हालेका थिए ।
महासंघको दमकमा आज सम्पन्न प्रथम प्रादेशिक अधिबेशनको निर्वाचन कार्यक्रमबाट भट्टराईको अध्यक्षतामा २४ सदस्यीय प्रदेश कार्यसमिति निर्विरोध निर्वाचित गरेको हो । निर्वाचित समितिको उपाध्यक्षमा भिष्मबहादुर गुरुङ, महिला उपाध्यक्षमा सीता खत्री, सचिवमा टेकनाथ घिमिरे , सहसचिवमा मोहनकुमार विष्ट चयन हुनुभएको निर्वाचन समितिका संयोजक लेखनाथ सेढाईले जानकारी दिए ।
महासंघको कार्यसमिति सदस्यहरुमा प्रजापतिदेवी विश्वास,हरिवहादुर केसी, बासुदेव गुरागाई,राधाकृष्ण बराल, गंगाप्रसाद चापागाई, भगीरथ शर्मा सुवेदी, दिपक पोख्रेल, मानेश्वर मेहता,भावना अर्याल, पदमबहादुर महत, टेकबहादुर बस्नेत, प्रेमकुमार आङदेम्बे निर्विरोध निर्वाचित भएका छन् । यस्तै, सदस्यहरुमा किशोर न्यौपाने, रेनुकुमारी बरुवाल,सृजना भट्टराई,रमेशकुमार अधिकारी, तेजराज तिम्सीना, काजीमान सिंह भण्डारी, सजित राई र गोपाल प्रसाई चयन भएको संयोजक सेढाईले जनाएका छन् ।
अधिबेशनको विहिबार कांग्रेसका पूर्व महामन्त्री तथा राष्ट्रियसभामा संसदीय दलका नेता कृष्णप्रसाद सिटौलाले उद्घाटन गरेका थिए । दमकस्थित कांग्रेस पार्टी कार्यालयमा आयोजित अधिबेशनमा कोशी प्रदेशका १४ वटै जिल्लाबाट महासंघको प्रतिनिधित्व गरि सय बढी प्रतिनिधि,पर्यवेक्षकहरुको सहभागिता रहेको थियो ।
साउन २३ , दमक / उच्च शिक्षा अध्ययनका लागि अन्तराष्ट्रिय मुलुकहरुतर्फ जाने विद्यार्थीहरुलाई शैक्षिक परामर्श उपलब्ध गराउने उदेश्यसहित ओली एण्ड एशोसिएटले दमकमा काार्यलय स्थापना गरेको छ ।
आज (शुक्रबार) दमकस्थित होटल संगमस्वटीस्को दोस्रो तलामा ओली एण्ड एशोसिएटले नयाँ व्यवस्थापन र योजनासहित दमकमा शाखा कार्यालय सञ्चालनमा ल्याएको हो ।
ओली एण्ड एशोसिएट दमक शाखाका सञ्चालक अशोक अधिकारीका अनुसार दमकमा उच्च शिक्षा अध्ययनका लागि अन्तराष्ट्रिय मुलुकहरुतर्फ जाने विद्यार्थीहरुलाई उचित परामर्श प्रदान गर्न नयाँ योजना र व्यवस्थापनसहित शाखा कार्यालय आजदेखि सञ्चालनमा ल्याइएको हो । होटल संगमस्वीटस्मा स्थापना गरिएको सो शाखा कार्यालयलाई औपचारिक उद्घाटन गरिएको छ ।
शुक्रबार, बिहान एक कार्यक्रमबीच नेपाल उद्योग बाणिज्य महासंघका केन्द्रीय सदस्य गोकुल श्रेष्ठ, दमक उद्योग बाणिज्य संघका अध्यक्ष गोपाल गुरागाई र ओली एण्ड एशोसिएट दमक शाखाका सञ्चालक अधिकारीकी ममतामयी माता तुलासा अधिकारीले संयुक्त रुपमा कार्यालयको उद्घाटन गर्नुभएको हो ।
सञ्चालक अधिकारीले ओली एण्ड एशोसिएट दमक शाखाबाट विश्वमै उत्कृष्ट ठहरिएका कलेजका प्रतिनिधिहरु, बैकिङ क्षेत्रका विज्ञ प्रतिनिधिहरुले विद्यार्थी तथा अभिभावकहरुलाई जानकारीमुलक प्रशिक्षण तथा परामर्श सेवा उपलब्ध गराउने बताउनुभयो ।
ओली एण्ड एशोसियटले अष्ट्रेलिया, क्यानडा, अमेरिका, युके, न्यूजिल्याण्ड जस्ता देशका कलजेहरुमा उच्च शिक्षा अध्ययनका लागि उचित परामर्श लगायतका सेवा प्रदान गर्दै आएको छ ।
शाखा कार्यालय उद्घाटन समारोहमा होटल संगम स्वीट्सका सञ्चालका एबम् लायन्सकर्मी बिमल शर्मा, पत्रकार अनिलदेब राई, बिष्णुप्रसाद पोख्रेल लगायत विभिन्न विद्यालयका शिक्षकहरु र संघसंस्थाका प्रतिनिधिहरुको उपस्थिति रहेको थियो ।
झापा, दमक — पहिलो पाइला नेपाल दमक शाखाको आयोजना र ब्राइटन कन्सल्टेन्सीको सहयोगमा बालबालिकालाई शैक्षिक सामग्री वितरण कार्यक्रम सम्पन्न भएको छ।
गौरादह–९ बैगुन्धुरास्थित बलभद्र प्रा.वि.मा अध्ययनरत सबै विद्यार्थीलाई करिब २० हजार रुपैयाँ बराबरका शैक्षिक सामग्री र दिवा खाजा वितरण गरिएको हो। कार्यक्रममा २० दर्जन कापी, ५० वटा सिसाकलम, ५० वटा पेन्सिल तथा खाजा वितरण गरिएको विद्यालयले जनाएको छ।
विद्यालय व्यवस्थापन समितिका अध्यक्ष बुद्धिमान निरौलाको अध्यक्षतामा सम्पन्न कार्यक्रममा गौरादह–९ का वडा सदस्य केदार धिताल प्रमुख अतिथि रहनु भएको थियो। कार्यक्रममा दमक शाखा अध्यक्ष राजु निरौला, ब्राइटन कन्सल्टेन्सीका सञ्चालक युवराज निरौला, प्रधानाध्यापक चेतमणि न्यौपाने, संस्थाका सल्लाहकार छवि घिमिरे, केन्द्रीय सदस्य मेघनाथ फुयाल, लबराज खड्का, दिवस खतिवडा लगायतको उपस्थिति थियो।
कार्यक्रममा बोल्दै प्रधानाध्यापक न्यौपानेले पहिलो पाइला नेपालको योगदानप्रति धन्यवाद ज्ञापन गर्नुभयो। ब्राइटन कन्सल्टेन्सीका सञ्चालक युवराज निरौलाले सामाजिक कार्यमा सहकार्य गर्न पाउँदा खुशी लागेको बताउनुभयो। दमक शाखा अध्यक्ष राजु निरौलाले संस्थाले शिक्षा, स्वास्थ्य, सरसफाइ, विद्यार्थी कपाल काट्ने अभियानलगायतका गतिविधि गर्दै आएको जानकारी दिनुभयो।
कार्यक्रम विद्यालयका शिक्षक गोबिन्द धितालको सञ्चालनमा सम्पन्न भएको थियो। कार्यक्रममा विद्यालयले ब्राइटन कन्सल्टेन्सीका सञ्चालक युवराज निरौला र पहिलो पाइला नेपाल दमक शाखालाई सम्मानपत्र प्रदान गरेको थियो।
गाैरादह, साउन २३ – पहिलो पाईला नेपाल गाैरादह शाखाको आयोजनामा आँखाको सुरक्षा सम्बन्धी सचेतना कार्यक्रम सम्पन्न भएको छ। गाैरादह शाखा सदस्य पोसांगा बास्तोलाको संयोजकत्वमा तथा शाखा अध्यक्ष भुपेन्द्र निरौलाको अध्यक्षतामा सम्पन्न कार्यक्रममा वडा नं. १ का वडाध्यक्ष एवं नगर प्रवक्ता नगेन्द्र भण्डारी प्रमुख अतिथि रहनुभएको थियो।
कार्यक्रममा केन्द्रीय सह-कोषाध्यक्ष दिवस खतिवडा, दमक शाखा सचिव सञ्जु निरौला, विद्यालयकी सहायक प्रधानाध्यापक थानेश्वरी ढकाल, विद्यालय व्यवस्थापन समितिका अध्यक्ष बुद्धिमान कार्की, गाैरादह आँखा अस्पतालका सञ्चालक ध्रुव गिरी लगायतको उपस्थिति रहेको थियो।
स्वागत मन्तव्य शाखा सह-सचिव लिला खत्रीले राख्नुभएको उक्त कार्यक्रममा अतिथिहरूले शुभकामना मन्तव्य व्यक्त गर्दै आँखाको स्वास्थ्यमा ध्यान दिनु र समयमै उपचार गराउनु पर्नेमा जोड दिनुभयो। विद्यार्थी तर्फबाट कक्षा १२ का गुडलक दाहालले कार्यक्रमप्रति प्रतिक्रिया व्यक्त गरेका थिए।
सचेतनामूलक प्रस्तुतिमा केसीका थापा र यशोदा अधिकारीले आँखाको रोग, कारण र बच्ने उपायबारे प्रष्ट पार्नुभयो। कार्यक्रममा शाखा अध्यक्ष भुपेन्द्र निरौला, द्वितीय उपाध्यक्ष बाबुराम अधिकारी, सचिव प्रदिप धमला, सह-सचिव लिला खत्री, सदस्य भुवन कटुवाल, गंगा ताजपुरिया र पोसांगा बास्तोलाको उपस्थिति रहेको थियो।
कार्यक्रमको प्राविधिक सहयोग गाैरादह आँखा अस्पतालले गरेको थियो भने स्थान उपलब्ध गराउने विद्यालय परिवारप्रति आयोजकले धन्यवाद ज्ञापन गरेको थियो। कार्यक्रमको सञ्चालन संस्थाका सचिव प्रदिप धमलाले गर्नुभएको थियो।