Blog

दमक, २७ साउन — दमक ५ स्थित ओम शान्ति डेन्टल हस्पिटलले दाँत सम्बन्धी सबै समस्या समाधान गर्दै बिरामीको विश्वास जित्दै आएको छ। आरामदायी वातावरण, अनुभवी डाक्टर, र सहृदय कर्मचारीका कारण यो अस्पताललाई यहाँका बासिन्दाले सबैभन्दा विश्वासिलो ठानेका छन्।

उपचारका लागि आउनु भएकि निशा राई जसले पहिले अन्य क्लिनिकमा उपचार गराए पनि समस्या समाधान नभएपछि यहाँको सेवा लिनुभएको थियो, भन्नुहुन्छ, “यहाँ डाक्टरको राम्रो चेकअप र सल्लाह अनुसार दाँत सफा गरिरहेको छु। वातावरण निकै राम्रो छ, जसले मलाई खुशी बनायो।”

दमकबाट उपचारका लागि आएकी अनु बस्नेतले भन्नुभयो, “मेरो दाँतमा पिप पाकेको थियो, सफा गराएँ र तीन वटा दाँत पनि खोलेँ। उपचारमा कुनै पीडा भएन, सेवा र सुविधा निकै मन पर्यो।”

ओम शान्ति डेन्टल हस्पिटलमा कार्यरत डा. सर्जन काशमी श्रेष्ठका अनुसार धेरै बिरामी समस्या गम्भीर भएपछि मात्र आउँछन्। “नियमित जाँच र सफाइलाई प्राथमिकता दिने हो भने दाँतका जटिल समस्या टार्न सकिन्छ। इन्फेक्सनले अरू स्वास्थ्य समस्यासमेत निम्त्याउन सक्छ,” उहाँले बताउनुभयो। अस्पतालले महिनामा २–३ पटक क्याम्प सञ्चालन गर्दै ओपीडी र परामर्शमा २० प्रतिशत छुट र केही बिरामीलाई निःशुल्क उपचार सुविधा उपलब्ध गराउँदै आएको छ।

अस्पतालका व्यवस्थापक कमल गैरेका अनुसार ओम शान्ति डेन्टल हस्पिटलको लक्ष्य दाँतको स्वास्थ्यलाई प्राथमिकता दिँदै सुन्दर मुस्कान र स्वास्थ्य जीवन सुनिश्चित गर्नु हो। अस्पतालले आफ्नो गुणस्तरीय सेवा, अनुभवी चिकित्सक, र मित्रवत् व्यवहारका कारण दमकमा सबैको मन जित्दै आएको छ।

दमक, २६ साउन – झापाको दमकमा साउन महिनाको अन्तिम सोमबारको अवसर पारेर विभिन्न संघसंस्थाले भक्तजनलाई प्रसाद वितरण गरेका छन्। दमक नगरपालिका–६ स्थित पशुपति मन्दिरमा पहिलो पाइला नेपाल दमक शाखाको आयोजना तथा इलाका प्रहरी कार्यालय दमक र क्लब हिमालयन टाइगरको सहयोगमा विशेष कार्यक्रम सम्पन्न भएको हो।

कार्यक्रमका प्रमुख अतिथि इलाका प्रहरी कार्यालय दमकका डिएसपी राम तिमल्सिना रहनुभएको थियो। प्रसाद प्रायोजन सिग्देल डिपार्टमेन्ट स्टोरका प्रोप्राइटर लोकनाथ सिग्देलले गरेका थिए। कार्यक्रममा फलफुल, मोही, पानी र चिया वितरण गरिएको थियो।आज अन्तिम सोमबार स्वतन्त्र युवा समूहले पनि भक्तजनहरुलाई केही प्रसाद वितरण गरिरहेका थिए ।

पहिलो पाइला नेपाल दमक शाखाका अध्यक्ष राजु निरौलाले ‘जहाँ दुख्छ, त्यहाँ पहिलो पाइला पुग्छ’ भन्ने नारासहित संस्थाले साउनका प्रत्येक सोमबार विभिन्न मन्दिरमा प्रसाद वितरण गरेको र आगामी दिनमा पनि यस्ता सामाजिक कार्य जारी रहने बताए। क्लब हिमालयन टाइगरका अध्यक्ष रेवतराज भण्डारीले पनि क्लब सामाजिक जिम्मेवारीअन्तर्गत निरन्तर क्रियाशील रहेको उल्लेख गरे।

कार्यक्रममा संस्थाका उपाध्यक्ष लवराज खड्का,केन्द्रीय सदस्य दिवस खतिवडा , जीवनचक्र समाज नेपालका अध्यक्ष गणेश गौतम, मेघनाथ फुएल, राप्रपा दमक नगर अध्यक्ष हेम सुवेदी ,क्लब हिमालयन टाइगरका पदाधिकारीहरू युना एन युनिस ट्रेन्ड सप्लायर्सका सञ्चालक हरि तिवारी, दमक उद्योग वाणिज्य संघका वरिष्ठ उपाध्यक्ष राजु खड्का, पहिलो पाइला नेपाल गौराद शाखाका सचिव प्रदिप धमला , देबु गडतौला, पूजा दाहाल, सन्जिब रिमाल, बिमल बराल, दीपक पौडेल, जुनु रेग्मी, सन्जु शिवाकोटी लगायतको उपस्थिति रहेको थियो। पहिलो पाइला नेपाल दमक शाखाका अध्यक्ष राजु निरौलाको अध्यक्षतामा कार्यक्रम सम्पन्न भएको थियो।

यसैगरी, दमक नगरपालिका–५ स्थित धनेश्वर मन्दिरमा पनि रोटरी क्लब अफ दमक लगायतका संस्थाले प्रसाद वितरण कार्यक्रम गरेका थिए।

साउन २६, दमक / काव्यको माध्यमबाट प्रकृति, जीवन, प्रेम, समाज, राष्ट्र र दर्शन प्रकट भएको एक विशेष साहित्यिक कविता गोष्ठी बुटवलमा सम्पन्न भएको छ। कार्यक्रममा केही छन्द, लय, अलंकार र अनुप्रास मिलेका अब्बल सिर्जनाहरु समेत प्रस्तुत गरिएका थिए।

राजन अधिकारीको अध्यक्षतामा सुरु भएको कार्यक्रममा छन्द कवि मिलन रिजालले संयोजन गरेका थिए भने धीर र शान्त स्वभावका रुद्र खनालले सञ्चालन गरेका थिए। कार्यक्रममा विराट अर्याल, कृष्ण ब. राउत, अनिष सापकोटा, राजीव खनाल (संस्थापक), वैभव क्षेत्री, सदीक्षा घिमिरे, प्रवीण रिजाल, अशेष भण्डारी, नारायण अधिकारी, राजीव गौतम (संरक्षक), मदन पोखरेल, सन्तोष बन्जाडे, प्रवेश पौडेल, विरेन्द्र खड्का, पारस खड्का, शिव तिवारी, सन्तोष न्यौपाने, पारस मरासिनी, समीप न्यौपाने, शिवहरि मरासिनी, डिआर न्यौपाने ‘सूर्य’ र मिलन रिजाललगायतका स्रष्टाहरुले गजल, मुक्तक, हास्यव्यङ्ग्य, गद्य कविता र पद्य कविता वाचन गरेका थिए।

शार्दूलविक्रीडित र शिखरिणी छन्दका उत्कृष्ट कवितासहित प्रारम्भिक चरणमा रहेका स्रष्टाहरुका कृतिहरुदेखि परिष्कृत रचनासम्मको प्रस्तुति भएको कार्यक्रमका अतिथिहरुलाई मायाको चिनो र सहभागीहरुलाई प्रमाणपत्र प्रदान गरिएको थियो। समापनका क्रममा सञ्चालक रुद्र खनाल केही समय ओझेल परेपछि युवा अध्यक्ष राजन अधिकारीले उत्साहपूर्वक कार्यक्रमको समापन गरेका थिए।

काठमाण्डौं, २५ साउन / पत्रकारसँग सम्बन्धित पाँचवटा संगठनले मिडिया काउन्सिल विधेयक यथास्थितिमा अघि बढाए आन्दोलनमा उत्रने चेतावनी दिएका छन्। संगठनहरूले विधेयकका प्रावधान सरकार नियन्त्रित र प्रेस स्वतन्त्रता संकुचन गर्ने बताउँदै संशोधन माग गरेका छन्। उनीहरूले सरकार, संसद र सम्बन्धित पक्षसँग छलफल गरी माग सम्बोधन नभए चरणबद्ध आन्दोलनमा जाने घोषणा गरेका छन्। २५ साउन, काठमाडौं। पत्रकारसँग सम्बन्धित पाँचवटा संगठनले मिडिया काउन्सिल विधेयक यथास्थितिमा अघि बढाए आन्दोलनमा उत्रने चेतावनी दिएको छ ।

प्रेस सेन्टर नेपालका अध्यक्ष कमल गिरी, समाजवादी प्रेस संगठन नेपालका अध्यक्ष शम्भु श्रेष्ठ, जनपत्रकार संगठन नेपालका अध्यक्ष शेरबहादुर विश्वकर्मा, क्रान्तिकारी प्रेस संगठनका संयोजक नारायण शर्मा र प्रेस नेपालका सल्लाहकार केशव अर्यालले संयुक्त प्रेस वक्तव्य निकालेर यस्तो चेतावनी दिएका हुन् । प्रतिनिधिसभामा विचाराधीन रहेको मिडिया काउन्सिल विधेयकका महत्वपूर्ण प्रावधान र छापाखाना तथा प्रकाशन ऐन संशोधनमार्फत अनलाइन सञ्चारमाध्यमको दर्तासम्बन्धी बनेको नयाँ व्यवस्थाबारे गम्भीर ध्यानाकर्षण भएको वक्तव्यमा उल्लेख छ । प्रतिनिधिसभाको विषयगत समितिमा छलफलमा रहेको मिडिया काउन्सिल विधेयकका महत्वपूर्ण प्रावधान सरकार नियन्त्रित र प्रतिगामी रहेको उनीहरूको निष्कर्ष छ ।

‘यसले पूर्ण प्रेस स्वतन्त्रतालाई संकुचन गरेको छ। प्रेस स्वतन्त्रताको विश्वव्यापी मान्यता, संविधानले प्रत्याभूत गरेको पूर्ण प्रेस स्वतन्त्रता, राष्ट्रिय आमसञ्चार नीति २०७३, आमसञ्चार क्षेत्र सुधार समितिको सुझाव र सरोकारवाला पक्षसँगको समझदारीबमोजिम विधेयक संशोधन गरेर स्वतन्त्र, स्वायत्त र सक्षम मिडिया काउन्सिल स्थापना गरिनुपर्छ’ वक्तव्यमा भनिएको छ, ‘सरोकारवाला पक्षसंग पर्याप्त छलफल र समझदारी गरी आवश्यक संशोधन गरेर मात्र विधेयक अगाडि बढाइनुपर्छ।’

सरकारले एकपछि अर्को प्रेस स्वतन्त्रता विरोधी कार्य गर्दै आएको दाबी गर्दै उनीहरूले मिडिया काउन्सिल विधेयक र अनलाइन सञ्चारमाध्यमको दर्तासम्बन्धी नयाँ व्यवस्थाले सरकारको प्रेसप्रतिको अनुदारता र प्रेस स्वतन्त्रता विरोधी रवैयाको पुष्टि गरेको बताएका छन् । ‘हाम्रा साझा धारणा तथा मागको यथाशक्य छिटो सम्बोधन गर्न सरकार, संसद र सम्बन्धित सबै पक्षको गम्भीर ध्यानाकर्षण गराउँछौं। सरोकारवालासँगको छलफलसहित हाम्रा माग सम्बोधनका लागि तत्परता नदेखाइए चरणबद्ध आन्दोलनमा जाने घोषणा गर्दछौं,’ वक्तव्यमा भनिएको छ।

साउन २५ , दमक / झापाको दमकमा यस वर्ष पनि गाईजात्रा पर्व भव्य र सांस्कृतिक उत्साहका साथ सम्पन्न भएको छ। नेवा देय् दबू दमकनगर समिति तथा विभिन्न स्थानीय संघसंस्थाको संयुक्त आयोजनामा भएको यस पर्वमा नगरवासीको उत्साहपूर्ण सहभागिता देखियो।

आज देशभर मनाइएको गाईजात्रा पर्वको अवसरमा दमक नगरपालिका परिसरबाट परिक्रमा सुरु गरी बजार क्षेत्रका विभिन्न मार्ग हुँदै समापन गरिएको थियो। यस क्रममा दमकमा दुई स्थानमा विशेष कार्यक्रमहरू आयोजना गरिएका थिए। नेवा देय् दबू दमकनगर समितिका कार्यवाहक अध्यक्ष रामप्रधानका अनुसार, गाईजात्रा एक वर्षअघि स्वर्गवास भएका पितृहरूको सम्झनामा आत्माको शान्तिका लागि गरिने धार्मिक र सांस्कृतिक विधि हो। यो परम्परा राजा प्रताप मल्लको पालादेखि निरन्तर चल्दै आएको छ।

पर्वको क्रममा इलाका प्रहरी कार्यालय दमक र ट्राफिक प्रहरी कार्यालय दमकले सुरक्षा व्यवस्था कडाइका साथ मिलाएको थियो। सहभागीहरूले परम्परागत पोशाक, नाचगान र सांस्कृतिक झाँकीसहित गाईजात्राको शोभायात्रा सम्पन्न गरेका थिए।

साउन २५ , दमक / दमक मोबाइल व्यवसायी सङ्घले एवाई मोबाइलका सञ्चालक प्रदिप राईज्यूकी श्रीमतीलाई आर्थिक सहयोग प्रदान गरेको छ। केही दिनअघि हात्तीको आक्रमणबाट गम्भीर रूपमा घाइते भएकी उहाँको हाल बिराटनगर न्युरो हस्पिटलमा उपचार जारी छ।

उपचारको क्रममा आवश्यक परेको तत्काल आर्थिक सहयोगको आवश्यकता बोध गरी, सङ्घका वरिष्ठ उपाध्यक्ष रेवती दाहालज्यूको अगुवाइमा संकलन गरिएको रु १,००,००० (एक लाख रुपैयाँ) आज बिराटनगर न्युरो हस्पिटलमा पुगेर उहाँलाई हस्तान्तरण गरिएको हो।

सङ्घले यस सहयोगमा साथ दिने सम्पूर्ण व्यवसायी साथीहरू प्रति हार्दिक आभार व्यक्त गर्दै, अझै पनि सहयोग गर्न चाहने महानुभावहरूले सङ्घमार्फत वा व्यक्तिगत रूपमा सहयोग गर्न सकिने जानकारी समेत सार्वजनिक गरेको छ।

यस सहयोग कार्यक्रमले व्यवसायीबीचको सहकार्य, मानवीय भावना र सामाजिक उत्तरदायित्वप्रतिको गहिरो प्रतिबद्धता प्रकट गरेको छ।