दमक, साउन २० — झापाको दमक नगरपालिका वडा नम्बर ८ स्थित पुरानो ट्याक्सी स्टेन सराएर वडा नम्बर ७ मा स्थानान्तरण गरिएपनि पुरानै स्थानमा ट्याक्सी पार्किङको समस्या ज्यूँका त्यूँ रहेको छ। दमक नगरपालिकाले पटक–पटक सूचना जारी गरी पुरानो स्टेनमा पार्किङ नगर्न आग्रह गरेपनि वेवास्ता गर्दै ट्याक्सीहरू पुरानै स्थानमा राखिने गरेको छ।
केही दिनअघि नगरपालिका प्रहरी टोलीले नियम उल्लङ्घन गर्ने पाँच वटा ट्याक्सीलाई हुईलक लगाएको थियो। तर त्यसपछि ती ट्याक्सीहरू नजिकै रहेको मिलन मार्ग टोल विकास संस्था परिसरमा लगेर पार्किङ गरिने गरेको पाइएको छ।
यसले व्यापार व्यवसायमा अवरोध पुगेको भन्दै मिलन मार्ग टोल विकास संस्थाले दमक नगरपालिकालाई ज्ञापनपत्र बुझाएको छ। संस्थाले ट्याक्सी व्यवसायीहरूले लापरवाही गर्दै जथाभावी पार्किङ गर्ने गरेको र यसले स्थानिय व्यवसायमा असर परेको भन्दै तत्काल पार्किङ निषेध गर्न र ट्याक्सी व्यवस्थापनको लागि प्रभावकारी कदम चाल्न माग गरेको हो।नगरपालिकाले अब कडा कदम चाल्ने जनाएको छ।
