भदौ १, दमक / कोशी प्रदेशकै दोस्रो ठुलो भनिएको दमकको रथ यात्रा भव्य रूपमा सम्पन्न भएको छ। आठ वर्षअघिदेखि मात्र सुरु गरिएको यो धार्मिक यात्रा पछिल्ला वर्षहरूमा उल्लेख्य जनसहभागिता र धार्मिक उत्साहका कारण चर्चित बन्दै गएको छ।

राधाकृष्ण मन्दिर, दमक–७ अगाडि भव्य मञ्च निर्माण गरिएर आयोजित कार्यक्रममा आकर्षक र सजाइएको रथमा भगवान श्रीकृष्णलाई विशेष विधिअनुसार बिराजमान गराइएको थियो। मञ्च अगाडि सुसज्जित रथले सहभागीहरुको ध्यान खिचेको थियो। आरती पश्चात सुरु गरिएको रथ यात्रा दमक नगरभित्र विभिन्न मार्गहरू हुँदै अघि बढेको थियो।

धार्मिक तथा सामाजिक दृष्टिकोणले निकै पवित्र मानिने रथ यात्रामा दमक नगरवासीसहित आसपासका क्षेत्रका नागरिकहरू उत्साहका साथ सहभागी भएका थिए। विभिन्न संघ(संस्थाका प्रतिनिधिहरू आ(आफ्नो पहिचान सहित उत्सवमा रमाइरहेका दृश्यहरू उल्लेखनीय थिए।

रथ यात्रामा जातीय, धार्मिक वा सांस्कृतिक भेदभाव नगरी सबै समुदायको एकतापूर्ण सहभागिता देखिएको थियो। सहयोगका विभिन्न स्वरूपहरू — पानी, सर्वत, फलफूल, प्रसाद, बिस्कुट, चकलेट वितरणजस्ता सेवाहरू — यात्राभर प्रदान गरिएका थिए।

तर, यसपटकको यात्रामा पनि रथको शिरले विद्युतको तार छुन पुगेपछि करेन्ट सर्ने झिनो जोखिम उत्पन्न भएको थियो। आयोजकहरूले यसलाई चुनौतीको रूपमा लिँदै आगामी वर्षका लागि विद्युतीय व्यवस्थापनलाई थप व्यवस्थित बनाउने बताएका छन्। रथ यात्रा मूल आयोजक समिति अध्यक्ष रोहित आचार्यले आगामी वर्षहरूमा पूर्वतयारीलाई अझ मजबुत बनाउने बताउनुभयो ।

दमक नगरपालिकाको प्रमुख संरक्षकत्वमा सञ्चालन गरिएको रथ यात्रामा नगरले प्रत्येक वर्ष भव्यता थप्दै आएको छ। यद्यपि, यस पटकको सहभागी संख्यामा अघिल्लो वर्षको तुलनामा केही कमी देखिएको थियो। नगर उप–प्रमुख रेगिना भट्टराई प्रसाईंका अनुसार, अहिले आसपासका पालिकाहरूमा पनि रथ यात्राको आयोजना हुन थालेकाले दमकमा सहभागीको संख्या कम हुन पुगेको हो। तर, आगामी वर्षदेखि यो यात्रालाई थप व्यवस्थित र ऐतिहासिक बनाउने लक्ष्य लिइएको बताइएको छ।

कोशी प्रदेशका विभिन्न स्थानमा यसपटक रथ यात्राहरू सम्पन्न भएका छन्। विशेषगरी विराटनगरमा सम्पन्न दक्षिण एसियाकै दोस्रो ठूलो भनिएको रथ यात्रा यस वर्षको मुख्य आकर्षण थियो। सोही स्तरमा दमकको रथ यात्रालाई विकास गर्ने योजनाबारे कोशी प्रदेश सांसद होम बहादुर थापाले जानकारी दिए ।