भदौ ७, दमक / दमक नगरपालिकाको पहलमा सेतुमरी कृषि सहकारी संस्था दमक–९ ले उत्पादन गरेको ‘दमकको बेसार’ शुक्रबारदेखि औपचारिक रूपमा बजारमा आएको छ ।
दमक नगरपालिकाका प्रमुख रामकुमार थापाले ‘दमकको बेसार’लाई राष्ट्रव्यापी रूपमा बजारीकरण गर्दै यसलाई दमकको चिनो तथा समृद्धिसँग जोडेर अघि बढाइने जानकारी दिनुभयो । उहाँका अनुसार हाल ४५ किसानले करिब १६ बिगाहा क्षेत्रमा व्यावसायिक रूपमा बेसार खेती गरिरहेका छन् ।
“दमकको पहिचान र उपहारको रूपमा समेत ‘दमकको बेसार’लाई प्रवर्द्धन गर्दै दमक र बेसारलाई पर्यायवाची बनाउने लक्ष्य लिइएको छ,” नगर प्रमुख थापाले भन्नुभयो ।
नगरपालिकाले गत वर्ष बेसार प्रवर्द्धनका लागि ५ लाख रुपैयाँ बजेट विनियोजन गरी कार्यक्रम थालनी गरेको थियो भने यस वर्ष पनि त्यति नै बजेट छुट्याएर खेतीको क्षेत्रफल विस्तार, किसान संख्या वृद्धि, बीउ–मल व्यवस्थापन, प्रशोधन तथा ब्रान्डिङमा लगानी गर्ने योजना रहेको छ ।
बेसारको ब्रान्डिङमा ‘साहस’ नामक संस्थाले प्राविधिक सहयोग गरिरहेको छ भने संकलन कार्य सेतुमरी कृषि सहकारीले गर्दै आएको दमक नगरपालिकाको कृषि शाखा प्रमुख चन्दा भट्टराईले बताउनुभयो ।
