दमक, भाद्र १९ / काठमाडौंको सातदोबाटोमा भाद्र १२, १३ र १४ गते सम्पन्न चौथो NTA लिग च्याम्पियनसिपमा दमक तेक्वान्दो डोजाङकी छात्रा सेमिना राईले पुम्से विधातर्फ कास्य पदक जितेकी छन्।
यस उपलब्धिप्रति खुसी व्यक्त गर्दै बुधबार झापाको दमकमा आयोजित विशेष कार्यक्रममा सेमिना राईलाई सम्मान गरिएको हो।
कार्यक्रममा दमक तेक्वान्दो डोजाङका अध्यक्ष जितु धिमालले खेलजीवनमा अझ बढी मेहनत र निरन्तर प्रशिक्षण आवश्यक रहेको बताउँदै विद्यार्थीहरूलाई आगामी प्रतिस्पर्धामा अझ उत्कृष्ट प्रदर्शन गर्न प्रोत्साहित गरे।
सम्मान समारोह सर्वोदय इङ्ग्लिस बोर्डिङ सेकेन्डरी स्कुलमा सम्पन्न भएको थियो। कार्यक्रममा हाम्रो सरोकार डट नेटका सञ्चालक अनिल देव राई, दमक तेक्वान्दो डोजाङका उपाध्यक्ष नवीन योगी, विद्यार्थीहरू को उपस्थित रहेको थियो। दमक तेक्वान्दो डोजाङले विगत केही वर्षदेखि दमकका चार विद्यालयमा करिब १५० विद्यार्थीलाई नियमित प्रशिक्षण दिंदै आएको छ।
