झापा, असोज २६ – नेपाल प्रहरीका महानिरीक्षक (आईजीपी) चन्द्रकुबेर खापुङले झापाको दमकस्थित इलाका प्रहरी कार्यालयको क्षतिग्रस्त संरचनाको स्थलगत निरीक्षण गर्नुभएको छ।
जेनजी आन्दोलनका क्रममा तोडफोड र आगजनीका कारण क्षतिग्रस्त भएका प्रहरी कार्यालयका संरचनाहरूको पुनर्निर्माण अवस्थाबारे जानकारी लिँदै उहाँले नागरिकस्तरबाट भइरहेको सहयोग र पुनर्निर्माण कार्यको प्रशंसा गर्नुभयो।
महानिरीक्षक खापुङले सो अवसरमा मातहतका सुरक्षा इकाइका प्रमुख र प्रतिनिधिहरूलाई आवश्यक निर्देशन दिँदै, नागरिक सेवामा समर्पित भएर काम गर्न प्रेरणा र आग्रह गर्नुभएको थियो।
निरीक्षण टोलीमा कोशी प्रदेश प्रहरी कार्यालय विराटनगरका प्रमुख डिआइजी इश्वर कार्की पनि सहभागी हुनुहुन्थ्यो।
प्रहरीका उच्च अधिकारीहरूले त्यहाँ जनप्रतिनिधि, सामाजिक संघ–संस्था र समुदायका प्रतिनिधिहरूसँग पनि शान्ति–सुरक्षाको अवस्था र नागरिक–प्रहरी सहकार्यका विषयमा संवाद गरेका छन्, इलाका प्रहरी कार्यालय दमकले जनाएको छ।
