पुस २३, दमक / जाडो मौसम सुरु भएसँगै झापाको दमकका विभिन्न स्थानमा भक्का व्यापारीहरू देखिन थालेका छन्। पूर्वी तराईमा लोकप्रिय परिकारका रूपमा चिनिने भक्का यतिखेर जाडो बढेसँगै धमाधम बिक्री हुन थालेको छ।
चामललाई मसिनो गरी पिधेर बनाइएको पिठोबाट तयार गरिने भक्का साधारण परिकार हो। यसमा अन्य सामग्री मिसाउन नपर्ने भएकाले भक्काको स्वाद सर्वत्र एउटै हुने गर्छ। माटोको भाँडामा पानी तताएर त्यसको बाफबाट भक्का पकाइन्छ। पानी उमालिएको भाँडाको मुखमा बीचमा प्वाल भएको माटोको फन्गेलो राखिन्छ, जसबाट उम्लेको पानीको बाफ बाहिर निस्कन्छ। सोही बाफको प्रयोग गरी सानो कचौरामा राखिएको चामलको पिठो २–३ मिनेटमा पकाएर भक्का तयार गरिन्छ।
यसरी तयार भएको भक्का नुन–खुर्सानी, अचार, चिया वा दूधसँग आ–आफ्नो स्वादअनुसार खाने गरिन्छ। भक्का व्यापारीहरू बिहान ३–४ बजेदेखि नै सडक किनारमा आएर बिक्री सुरु गर्छन्। बिहान करिब १० बजेसम्ममा उनीहरूले पिसाएर ल्याएको पिठो सकिने गरेको र यस अवधिमा करिब ३ हजार रुपैयाँसम्मको व्यापार हुने व्यापारीहरू बताउँछन्।
पछिल्लो समय भक्कालाई राजबंशी समुदायले आफ्नो जातीय पहिचान र ब्राण्डका रूपमा प्रचार गर्न थालेका छन्। त्यसैको परिणामस्वरूप केही वर्षयता झापामा ‘भक्का दिवस’ समेत मनाउन थालिएको छ। दमक नगरपालिकाले पनि भक्का दिवसको अवसरमा कार्यक्रम आयोजना गरी भक्का व्यापारीहरूलाई प्रोत्साहनस्वरूप सहयोग गर्दै आएको छ।
जाडो मौसममा भक्काले शरीरलाई ताप प्रदान गर्ने भएकाले यसको चलन बढेको बताइन्छ। एक स्थानीयले विगत सम्झँदै भने, “पहिला मंसिर, पुष र माघमा निकै जाडो हुन्थ्यो। शरीर न्यानो राख्न सजिलै बनाउन सकिने र सबैले खान मिल्ने भएकाले भक्का बनाउन थालिएको हो।”जाडो मौसमसँगै स्वाद र परम्पराको प्रतीक बनेको भक्का दमकसहित पूर्वी तराईका बजारमा पुनः चर्चामा आएको छ।
