माघ २१, बिर्तामोड / झापाको बिर्तामोडमा मेची प्रशोधित पानी उत्पादक सङ्घको आठौँ वार्षिक साधारण सभा तथा तेस्रो अधिवेशन सम्पन्न भएको छ। अधिवेशनबाट एक्वा मेरी पानी फ्याक्ट्रीका सञ्चालक पदम राउत सर्वसम्मत रूपमा अध्यक्षमा निर्वाचित हुनुभएको छ।

बुधबार बिर्तामोड नगरपालिका–५ स्थित अर्किड होटेलमा आयोजित कार्यक्रममा नेपाल पानी उद्योग महासङ्घका केन्द्रीय उपाध्यक्ष तथा कोशी प्रदेश संयोजक रुपचन्द्र नौलखा प्रमुख अतिथिका रूपमा उपस्थित रहनुभएको थियो। कार्यक्रमलाई सम्बोधन गर्दै प्रमुख अतिथि नौलखाले पानी उद्योगलाई अझ स्वच्छ, सुरक्षित र गुणस्तरीय बनाउन आवश्यक मापदण्डहरू कडाइका साथ पालना गर्न उद्योगीहरूलाई आग्रह गर्नुभयो।

अध्यक्षमा निर्वाचित पदम राउतले वार्षिक प्रतिवेदन प्रस्तुत गर्दै गत एक वर्षमा सम्पन्न कार्यक्रमहरूको विवरण सार्वजनिक गर्नुभयो। उहाँले जिल्लास्तरीय पानी उद्योगीहरूबीच एकता सुदृढ गर्दै गुणस्तरीय उत्पादन र मुनाफासहितको बिक्री–वितरणलाई प्राथमिकता दिइएको जानकारी दिनुभयो। साथै कोशी प्रदेशभर मूल्य समायोजन तथा एउटै प्रणाली लागू गर्न प्रदेशस्तरीय संयन्त्र स्थापना गरी प्रदेशलाई नियमनकारी बनाइएको बताउनुभयो।

आगामी एक वर्षका लागि नयाँ नीति तथा कार्यक्रम प्रस्तुत गर्दै अध्यक्ष राउतले गुणस्तरीय उत्पादन र व्यवस्थित बिक्री–वितरणलाई अझ प्रभावकारी बनाउने, जिल्लास्तरीय उद्योगीहरूलाई सङ्घमा आबद्ध गराउने, संघको नीति तथा विधानअनुसार भाइचाराको वातावरण सिर्जना गर्ने तथा छिमेकी जिल्लामा हुने गतिविधिहरूमा सक्रिय सहभागिता जनाउने प्रतिबद्धता व्यक्त गर्नुभयो।

अधिवेशनबाट सात सदस्यीय कार्यसमिति गठन गरिएको छ। उपाध्यक्षमा प्रकाश महत्तो, सचिवमा राजेन्द्र अधिकारी , कोषाध्यक्ष मदन पाण्डे चयन हुनुभएको छ भने सदस्यहरूमा अन्जना निरौला, सुमन भट्टराई र टिका पराजुली रहनुभएको छ। कार्यक्रमको सञ्चालन सङ्घका सचिव राजेन्द्र अधिकारीले गर्नुभएको थियो।