चैत २८, दमक / झापाको दमकस्थित मुख्य बजार क्षेत्रमा निर्माणाधीन ‘दमक सपिङ कम्प्लेक्स’को भौतिक प्रगति करिब ४० प्रतिशत र आर्थिक प्रगति करिब ३५ प्रतिशत पुगेको छ। एक समय सुकुम्बासीहरूको बसोबास रहेको तथा पछि दमक नगरपालिकाले अस्थायी टहरा निर्माण गरी भाडामा लगाएको यस स्थानमा अहिले आधुनिक र भव्य व्यापारिक संरचना निर्माण भइरहेको छ।
पहिले सुनचाँदी व्यवसायीहरूको बाक्लो उपस्थितिका कारण ‘सुनचाँदी लाइन’का रूपमा परिचित यस क्षेत्रका पुराना संरचना हटाएर सात तलाको अत्याधुनिक कम्प्लेक्स निर्माण थालिएको हो। ४३ करोड २४ लाख १६ हजार ६ सय ४४ रुपैयाँ लागतमा निर्माण भइरहेको यस कम्प्लेक्समा अण्डरग्राउण्डसहित सात तला रहनेछन्। अण्डरग्राउण्डमा सवारी पार्किङको व्यवस्था गरिनेछ भने भुईँतलामा १२ वटा व्यावसायिक स्टल रहनेछन्। यहाँ दुई वटा लिफ्ट र दुई वटा एस्केलेटरको सुविधा रहनेछ।
पहिलो तलामा एक डिपार्टमेन्टल स्टोरका लागि स्थान छुट्याइएर बाँकी भागमा ९ वटा पसल राख्ने व्यवस्था गरिएको छ। दोस्रो तलामा बैंकका लागि आवश्यक क्षेत्र छुट्याइएको छ भने थप ६ वटा पसल सञ्चालन गर्न मिल्ने संरचना निर्माण भइरहेको छ। तेस्रो तलामा करिब २२० जना अट्ने क्षमताको सिनेमा हल र व्यायामशाला रहनेछ भने चौथो तलामा सिनेमा सञ्चालनका लागि आवश्यक पूर्वाधार निर्माण गरिनेछ। पाँचौं तलामा खुला (रुफटप) रेष्टुरेन्ट तथा बार सञ्चालन गर्न मिल्ने व्यवस्था हुनेछ भने सबैभन्दा माथिल्लो भागमा दमक बजार अवलोकन गर्न मिल्ने ‘भ्यू पोइन्ट’ निर्माण गरिने योजना छ।
निर्माण सम्झौताअनुसार उक्त परियोजना आगामी पुष मसान्तभित्र सम्पन्न गर्ने लक्ष्य राखिएको छ। कम्प्लेक्स सञ्चालनसम्बन्धी व्यवस्थापन मोडालिटी आगामी आर्थिक वर्षको नगरसभामा पेश हुने आर्थिक ऐनमार्फत तय गरिने दमक नगरपालिकाका नगर प्रमुख रामकुमार थापाले जानकारी दिनुभयो।
