जेठ ६, दुधे / दुधेमा आजदेखि चौथो स्वर्गीय कर्णबहादुर नेम्बाङ स्मृति भेट्रान फुटबल प्रतियोगिता २०८३ सुरु भएको छ। दुधे भेट्रानको आयोजनामा सुरु भएको प्रतियोगिताको उद्घाटन शिवसताक्षी नगरपालिकाका नगर प्रमुख मेगाहाङ थोप्रा को प्रमुख आतिथ्यतामा सम्पन्न भएको थियो। कार्यक्रममा झापा ११ फुटबल क्लब का अध्यक्ष जल कुमार गुरुङ विशिष्ट अतिथिका रूपमा उपस्थित रहेका थिए। उद्घाटन खेलमा पुर्वेली भेट्रानले प्रकाशपुर भेट्रानलाई ५–१ गोल अन्तरले पराजित गर्दै प्रतियोगितामा विजयी सुरुवात गरेको छ। खेलभर दबाबमा राखेको पुर्वेली भेट्रानका खेम पोख्रेलले व्यक्तिगत चार गोल गर्दै उत्कृष्ट प्रदर्शन गरे। उनले ११औं, १६औं, २८औं र ५१औं मिनेटमा गोल गरेका थिए। टोलीका लागि अर्को गोल सन्तोष राईले खेलको तेस्रो मिनेटमै गरेका थिए।

प्रकाशपुर भेट्रानका तर्फबाट टीका कटुवालले १९औं मिनेटमा सान्त्वना गोल फर्काए। उत्कृष्ट प्रदर्शन गरेका खेम पोख्रेल खेलको म्यान अफ दि म्याच घोषित भए। उद्घाटन कार्यक्रममा इलाका प्रहरी कार्यालय झिलझिलेका प्रमुख सुभाष केसी तथा शिवसताक्षी–११ का वडा अध्यक्ष बहादुर आङ्बो लगायतको उपस्थिति रहेको थियो। प्रतियोगिताको विजेताले नगद रु. १ लाख ५१ हजार तथा उपविजेताले रु. ८१ हजार पुरस्कार प्राप्त गर्ने आयोजकले जनाएको छ। भोली हुने खेलअन्तर्गत आयोजक दुधे भेट्रान (बि) ले कनकाई भेट्रानसँग प्रतिस्पर्धा गर्नेछ भने अर्को खेलमा पथरी शनिश्चरे भेट्रान र बिर्तामोड भेट्रान आमनेसामने हुनेछन्।