जेठ २ , कमल / सामाजिक सेवामा सक्रिय संस्था पहिलो पाईला नेपालले आफ्नो शाखा विस्तार अभियानलाई निरन्तरता दिँदै कमल गाउँपालिकामा प्रस्तावित शाखा गठन गरेको छ। देशभर शाखा सञ्जाल विस्तार गर्दै आएको संस्थाको मातृशाखाका रूपमा पहिलो पाइला नेपाल दमक शाखाको पहलमा कमलमा तदर्थ समिति गठन गरिएको हो। केन्द्रीय सह–कोषाध्यक्ष दिवस खतिवडा को प्रमुख आतिथ्यतामा सम्पन्न कार्यक्रममा सन्जु निरौलाको संयोजकत्व तथा कुमार पराजुलीको सह–संयोजकत्वमा तदर्थ समिति गठन गरिएको बताइएको छ।

कार्यक्रममा पहिलो पाइला नेपाल दमक शाखा का अध्यक्ष राजु निरौला, उपाध्यक्ष लवराज खड्का, सचिव पूजा दाहाल, गौरादह शाखाका अध्यक्ष भुपेन्द्र निरौला, सचिव प्रदीप धमला, दमक शाखाका सल्लाहकार गणेश प्रधान, सामाजिक व्यक्तित्व त्रिलोचन अधिकारी, तारा बस्नेत, करुणा प्रधान लगायत स्थानीयको उपस्थिति रहेको थियो। कार्यक्रममा दिवस खतिवडा र सल्लाहकार गणेश प्रधानले संस्थाको परिचय तथा सामाजिक अभियानबारे जानकारी गराएका थिए। अतिथि त्रिलोचन अधिकारीले पहिलो पाइलाले समाजमा गर्दै आएका गतिविधिको प्रशंसा व्यक्त गरेका थिए।

नवनिर्वाचित संयोजक सन्जु निरौलाले तदर्थ समिति गठनमा सहयोग गर्ने सबैप्रति धन्यवाद व्यक्त गर्दै आगामी शनिबार विशेष कार्यक्रम आयोजना गर्ने तयारी रहेको जानकारी दिइन्। कार्यक्रमको सञ्चालन तथा औचित्यमाथि प्रकाश राजु निरौला ले पारेका थिए। संस्थाले शिक्षा, स्वास्थ्य, सरसफाइ तथा विपन्न वर्गका बिरामीलाई सहयोग गर्दै विभिन्न सामाजिक अभियान सञ्चालन गर्दै आएको जनाएको छ। हाल संस्था ६ वटा सामाजिक अभियानमार्फत सक्रिय रहेको र पूर्वी नेपालमा शाखा विस्तारलाई तीव्रता दिइएको बताइएको छ। केही दिनअघि मात्रै उर्लाबारीमा पनि प्रस्तावित शाखा गठन गरिएको थियो।