दमक / रोटरी क्लब अफ दमकले आगामी वर्ष २०८२/८३ का लागि वार्षिक कार्ययोजना सार्वजनिक गरेको छ। क्लबले शिक्षा, स्वास्थ्य, शान्ति, सरसफाइ, वातावरण संरक्षण, महिला सशक्तीकरण, आर्थिक सशक्तीकरण लगायतका ७ मुख्य क्षेत्रलाई प्राथमिकतामा राख्दै करिब २८ लाख रुपैयाँ बजेटसहितको योजना अघि सारेको हो।

रोटरी क्लब अफ दमकले सेवा, समर्पण र समावेशीताको भावनालाई आत्मसात् गर्दै आगामी एक वर्षका लागि प्रत्येक महिनामा फरक-फरक कार्यक्रम सञ्चालन गर्ने निर्णय गरेको छ। क्लबले बिहिबार पत्रकार सम्मेलन गरेर आगामी एक बर्ष भित्र सञ्चालन गर्ने सामाजिक सेवाका कामहरु बारेमा जानकारी गराएको थियो ।

शान्ति र द्वन्द्व समाधान,रोग निवारण र उपचार,स्वच्छ पानी र सरसफाइ,आमा तथा बाल स्वास्थ्य,शिक्षा र साक्षरता,आर्थिक विकास र सशक्तीकरण, वातावरण संरक्षण मुख्य योजना तथा कार्यक्रमहरू रहेको रोटरी क्लबका पूर्व अध्यक्ष तथा क्लबका सर्भिस प्रोजेक्टर अध्यक्ष सन्दीप चापागाइँ दिपुले बताउनुभयो ।

रोटरी क्लबका अध्यक्ष अग्रवालले पोलियो निर्मुलीकरण, स्वास्थ्य शिविर, रक्तदान सहित स्वास्थ्य चेतनाका कार्यक्रमहरु गरिने जानकारी दिनु भयो । त्यस्तै मातृ तथा बाल स्वास्थ्य तर्फ सुरक्षित प्रसुति, पोषण , खोप कार्यक्रम आदी सञ्चालन गरिने जनाइएको छ ।

दमकमा स्थापनाकालदेखिनै सक्रिय भुमिका निर्वाह गर्दै आएको संस्थाले दमकमानै पहिलो पटक मिर्गौलाका बिरामीहरुका लागि डयलोसिस सेवा सञ्चालन गरिरहेको र दमकको एक निजी अस्पतालसँगको साझेदारीमा सञ्चालित सो सेवाबाट दैनिक १४ देखि १६ जना सम्म बिरामीहरुले सेवा लिइरहेका रोटरी क्लब अफ दमकका निवर्तमान अध्यक्ष समेत विक्रमकुमार साहले जानकारी दिनुभयो ।

लाइफलाइन अस्पताल दमकसँगको साझेदारीमा सञ्चालित सो सेवा दमक र आसपास क्षेत्रका लागि पयाृप्त नभएकाले थप विस्तारको योजना रहेको समेत उहाँले बताउनु भयो । सो अवसरमा क्लबका पूर्व अध्यक्षहरु नविन श्रेष्ठ, लगायत रोटरीमा क्रियाशील व्यक्तित्वहरुले रोटरीको कार्यक्षेत्र, योजना र यसबाट समाजमा पुगेको योगदान आदीका बिषयमा जानकारी गराउनु भएको थियो ।

रोटरी क्लब अफ दमकले स्थानीय तहसँग समन्वय गर्दै आगामी दिनमा पनि समाजसेवामार्फत सकारात्मक परिवर्तन ल्याउने प्रतिबद्धता जनाएको छ। कार्यक्रम केशवकुमार अग्रवालकाे अध्यक्षतामा सम्पन्न भएको थियो ।