दमक, २८ असोज– ७०औँ प्रहरी दिवसको अवसर पारेर आज इलाका प्रशासन कार्यालय दमकमा रक्तदान कार्यक्रम सम्पन्न भएको छ। पछिल्लो समयमा दमक आसपासका अस्पतालहरूमा रगतको अभाव देखिएकाले उक्त समस्या समाधानका लागि प्रहरी दिवसकै अवसरमा रक्तदान कार्यक्रम आयोजना गरिएको हो।
रक्तदान कार्यक्रममा इलाका प्रहरी कार्यालय दमकका प्रहरीहरू, विभिन्न संघसंस्थाका प्रतिनिधिहरू र सामाजिक अभियन्ताहरूले सक्रिय सहभागिता जनाएका थिए। कार्यक्रममा १०९औँ पटक रक्तदान गर्दै दमकका सामाजिक व्यक्तित्व तीर्थराज बस्नेतले उदाहरणीय योगदान दिनुभएको छ।
कार्यक्रम इलाका प्रशासन कार्यालय दमकका प्रमुख रामप्रसाद तिमसिनाको अध्यक्षतामा सम्पन्न भएको थियो। कार्यक्रममा उद्योग वाणिज्य संघ दमकका अध्यक्ष गोपाल गुरागाई, नेपाल रेडक्रस सोसाइटी दमक उपशाखाका सभापति प्रकाश बुढाथोकी, रक्तसञ्चार प्रमुख सिद्धार्थ दाहाल, जीवन चक्र समाजका अध्यक्ष गणेश गौतम, पहिलो पाइला नेपाल दमक शाखाका अध्यक्ष राजु निरौला, सामाजिक व्यक्तित्वहरू मेघनाथ फुयाल, रुवल अधिकारी, बासुदेव काफ्ले, डा. लेखनाथ न्यौपाने, जेसिसका राजेन्द्र बिमली लगायतका अतिथिहरूको उपस्थितिमा सम्पन्न भएको थियो।
कार्यक्रममा उपस्थित सबैप्रति धन्यवाद व्यक्त गर्दै इलाका प्रहरी कार्यालय दमकका प्रमुख तिमसिनाले रक्तदान जस्तो मानवीय कार्यले समाजमा सकारात्मक सन्देश फैलाउने बताउनुभयो।
२७ पिन्ट रगत सङ्कलन भएको रेडक्रसकर्मी विनोद अधिकारीले जानकारी दिनुभयो।