चैत २५, दमक / सडक दुर्घटना न्यूनीकरण गर्ने उद्देश्यसहित दमक नगरपालिका ले इलाका प्रहरी कार्यालय दमकलाई करिब ५ लाख रुपैयाँ बराबरका मापासे तथा लागूऔषध सेवन पहिचान गर्ने सामग्री हस्तान्तरण गरेको छ। नगरपालिका कार्यालय परिसरमा आज आयोजित संक्षिप्त कार्यक्रममा ३ थान ब्रेथलाइजर मेसिन र लागूऔषध परीक्षणका लागि १०० थान किट उपलब्ध गराइएको समाज कल्याण शाखाका अधिकृत केशव प्रसाई ले जानकारी दिए।

उक्त सामग्रीहरू इलाका प्रहरी कार्यालय दमकका प्रमुख तथा प्रहरी नायव उपरीक्षक किशोर लम्साल लाई नगर प्रमुख रामकुमार थापा, उपप्रमुख रेगीना भट्टराई तथा प्रमुख प्रशासकीय अधिकृत सुनिल निरौंला लगायतले संयुक्त रूपमा हस्तान्तरण गरेका हुन्। सामग्री हस्तान्तरण गर्दै नगर प्रमुख थापाले चालकहरूले मादक पदार्थ तथा लागूऔषध सेवन गरी सवारी चलाउने प्रवृत्ति बढ्दै गएको भन्दै त्यसलाई नियन्त्रण गर्न यस्ता उपकरण प्रभावकारी हुने विश्वास व्यक्त गरे। उपप्रमुख भट्टराईले पनि ब्रेथलाइजर लगायतका सामग्रीले मापासे तथा लागूऔषध परीक्षणलाई थप सहज बनाउने धारणा राखिन्।

कार्यक्रममा प्रहरी नायव उपरीक्षक लम्सालले आवश्यक उपकरण अभावका कारण चेकजाँच कार्यमा समस्या हुँदै आएको उल्लेख गर्दै अब भने चेकजाँचलाई केही हदसम्म प्रभावकारी बनाउन मद्दत पुग्ने बताए ।यसअघि गत भदौमा भएको जेनजी आन्दोलन का क्रममा दमकस्थित प्रहरी तथा ट्राफिक कार्यालयमा आगजनी र लुटपाट हुँदा आधा दर्जनभन्दा बढी ब्रेथलाइजर मेसिन हराएको थियो। त्यसयता एउटा मात्र उपकरणको सहायताले मापासे जाँच सञ्चालन हुँदै आएको थियो।