असाेज २१, दमक / झापाको दमक–५ धनेश्वर चोक निवासी चन्द्रमान रिमालका ५ वर्षीय छोरा लविस रिमाल बेलुका बुवासँगै आफ्नै घरको तल्लो तलामा सुतेका थिए। तर बिहान उठ्दा उनी मृत अवस्थामा फेला परेको परिवारले जनाएको छ।
घटनाबारे जानकारी पाएपछि इलाका प्रहरी कार्यालय दमकबाट प्रहरी टोली पुगेर आवश्यक अनुसन्धान र कानुनी प्रक्रिया अघि बढाइएको प्रहरीले जनाएको छ ।
असाेज १८, दमक / तमोर करिडोर अन्तरगत पाँचथरको कुम्मायक ३ कात्तिकेमा भएको सवारी दुर्घट्नामा ६ जनाको मृत्यु भएको छ । मृत्यु हुनेमा ३ महिला र ३ पुरुष रहेको पाँचथरका प्रमूख जिल्ला अधिकारी अरुण पोखरेलले जानकारी दिए । दुर्घट्नामा ६ जना घाइते छन । घाइते भएकाहरुमा एकजना ८ वर्षका बालक सहित १ महिला र ४ पुरुष रहेको पनि पोखरेलले जनाए ।
घाइतेहरुलाई उद्धार गरी उपचारार्थ विपि कोइराला स्वास्थ्य विज्ञान प्रतिष्ठान धरान पठाइएको छ । घट्नामा ज्यान गुमाएका ६ जनाको शव पोष्टमार्टमका लागि जिल्ला अस्पताल पाँचथरमा ल्याइदैछ । जीपमा १२ जना रहेको जानकारीका आधारमा खोजी कार्य जारी राखिएको पनि प्रहरीले जनाएको छ ।
शनिबार बिहान ताप्लेजुङको साँवादेखि धरानतिर जाँदै गरेको मे १ ज ३०५५ नम्बरको जिप पाँचथरको कुम्मायक गाउँपालिका–३ को सिमाना कात्तिके भीर नजिकै सडकबाट करिब तीन सय मिटर तल खसेको थियो । थपको उद्धार प्रयार जारी छ । दुर्घटनामा परेका अधिकांस ताप्लेजुङका नागरिक रहेको अनुमान गरिएको छ ।
झापा , असोज १५ । झापाको बुट्टाबारीमा भएको दुर्घटनामा ३ जनाको मृत्यु भएको पुष्टि भएको छ ।
आज बिहान ९.३० बजे बिर्तामोड ६ स्थित बुट्टाबारीमा पश्चिमबाट पूर्वतर्फ जाँदै गरेको प्रदेश १–०११–००१ ख ४४५९ नम्बरको सगरमाथा यातायातको यात्रुबाहक बस अनियन्त्रित भई सडकबाट ५ मिटर तल्तिर पल्टदा त्यसमा सवारमध्ये एकजनाको घटनास्थलमै मृत्यु भएको हो । अन्य दुईजनाको अस्पताल लाँदै गर्दा मृत्यु भएको बताइएको छ । दुर्घटनामा एक दर्जनभन्दा बढी घाइते भएकाले प्रहरी र स्थानीयले उद्धार गरि नजिकको अस्पताल लैजाने कार्य भैरहेको छ ।
असाेज १, दमक – पछिल्ला घटनाक्रम र प्रदर्शनका क्रममा दमक नगरपालिकामा ठूलो मात्रामा भौतिक क्षति भएको प्रारम्भिक विवरण सार्वजनिक गरिएको छ। इलाका प्रहरी कार्यालयको मुजुल्का तथा प्रारम्भिक मूल्यांकन अनुसार,
दमक नगरपालिकाको क्षति रकम करिब रु. २३,००,००,०००/- (तेइस करोड रुपैयाँ) पुगेको छ।
त्यस्तै, आन्तरिक राजस्व कार्यालयको क्षति रकम रु. ३,०६,९३,९८३/- (तीन करोड छ लाख त्रियानब्बे हजार नौसय त्रियासी रुपैयाँ) अनुमान गरिएको छ।
नगरपालिका र स्थानीय प्रशासनले जानकारी दिँदै यो क्षति अत्यन्त दुःखद भएको बताएका छन्। साथै अन्य सरकारी निकाय र निजी क्षेत्रमा भएको क्षतिको क्रमिक मूल्यांकन कार्य जारी रहेको जनाइएको छ। प्रहरी र प्रशासनले थप विवरण संकलन गर्ने र आवश्यक कारबाही अघि बढाउने तयारी गरेको जनाएको छ।
भदौ २७, झापा _जेनजी आन्दोलनका क्रममा बिर्तामोडमा घाइते भएका अर्का प्रदर्शनकारीको पनि मृत्यु भएको छ । मृत्यु हुनेमा अर्जुनधारा- ८ हात्तीकिल्लाका ३२ वर्षीय दिनेश राजवंशी रहेका छन् । बीएण्डसी अस्पतालमा उपचाररत उनको शुक्रवार बिहान ११.३५ बजे मृत्यु भएको परिवारजनले जनाएका छन् ।
प्रहरी र प्रदर्शनकारीबीचको झडपपश्चात् प्रदर्शनकारीहरुले जिल्ला ट्राफिक प्रहरी कार्यालयलाई कब्जा लिई आगजनी गर्ने क्रममा कार्यालयभित्र रहेको ग्यास सिलिन्डर बिष्फोट भई राजवंशी घाइते भएका थिए ।उनको पेट लगायत शरीरका विभिन्न भागमा चोट लागेको थियो ।
यसअघि जिल्ला ट्राफिक प्रहरी कार्यालय बिर्तामोड अगाडि भएको झडपमा हिलिहाङ–२ पाँचथर घर भई बिर्तामोड १० मा बस्दै आएका अन्दाजी ३५ वर्षका कमल भण्डारी र अर्जुनधारा -८ निवासी २८ वर्षका गोपाल सेढाईको मृत्यु भएको थियो ।
जेनजी विद्रोहकै क्रममा सुनसरीको इटहरीमा झडप हुँदा २३ गते इटहरीका २३ वर्षीय अभिषेश श्रेष्ठ र इटहरी- १४ का मोहन सरदारको मृत्यु भएको थियो ।कोशी प्रदेश प्रहरी कार्यालयका प्रवक्ता प्रहरी वरिष्ठ उपरीक्षक दिपक पोखरेलले घाइतेको तथ्याङ्क भने नआइसकेको बताए । ‘हामी विवरणहरू सङ्कलन गरिरहेका छौँ । अहिलेसम्म यकिन विवरण आएको छैन,’ उनले भने ।
भदौ २५ दमक, सुजन गाैतम – झापाको दमक नगरपालिका वडा नं ५ स्थित क्याम्पस मोडबाट आमदा अस्पताल जाने बाटोमा खुकुरी प्रहार भएको छ। घटनामा दुई जना घाइते भएका छन्।
उर्लाबारी नगरपालिका वर्गाछी बस्ने २६ वर्षीय अमन मोता गम्भीर घाइते भएका छन्। उनको टाउकोमा गहिरो चोट लागेको र दमकस्थित निम्स अस्पतालमा उपचार भइरहेको छ। अर्का घाइते दमक नगरपालिका वडा नं ९ बस्ने अर्जुन राई रहेका छन्, उनको अवस्था सामान्य रहेको बताइएको छ।
घाइते अर्जुन राईका अनुसार करिब आठ जनाको समूह मोटरसाइकलमा आएर क्यारमबोर्ड खेलिरहेको बेला खुकुरी प्रहार गरेका थिए। घटनामा सिरुपाते खुकुरी, बियरको बोतल र बाइकको हेल्मेट प्रयोग भएको जानकारी दिइएको छ।
खुकुरी प्रहार गर्ने मध्ये दमक नगरपालिका वडा नं ९ बस्ने सुनिल वानेन फागो (उपनाम माइला) र दमक वडा नं ९ कै सनम लिम्बुको संलग्नता खुलेको छ। सनम लिम्बुले हेल्मेटले प्रहार गरेको र उनी लागूऔषध कारोबारमा संलग्न रहेको समेत खुलेको छ। अन्य ६ जनाको पहिचान भने अहिलेसम्म खुल्न सकेको छैन।
घटना सम्बन्धी थप अनुसन्धान गर्नका लागि Gen – Z आन्दोलनका कारणले दमकमा प्रहरीसमेत नरहेको जानकारी गर्दछौं।
भदौ २४, झापा / सरकारले सामाजिक सञ्जाल नियन्त्रण गर्ने उद्देश्यले गरेको निर्णयविरुद्ध आइतबार सुरु भएको आन्दोलनलाई नियन्त्रणमा लिने क्रममा झापामा भएका भिडन्तमा १२ जना घाइते भएका छन्। सोमबार दमक, विर्तामोडसहितका विभिन्न क्षेत्रमा प्रदर्शन भइरहेका बेला प्रहरीले अश्रुग्याँस, लाठीचार्ज र गोली प्रहारसमेत गरेको थियो।
जिल्ला प्रहरी कार्यालय झापाले मंगलबार बिहान संचारमाध्यमलाई उपलब्ध गराएको विवरणअनुसार घाइतेमध्ये अधिकांश दमकमा प्रदर्शन गर्नेहरू रहेका छन्। उनीहरूलाई प्रारम्भिक उपचारपछि थप उपचारका लागि विभिन्न अस्पतालहरूमा पठाइएको छ।
घाइतेहरूको विवरण
प्रकाश भट्टराई (३०), कमल–५ – बायाँ खुट्टाको फिलामा चोट, दमक अस्पतालमा उपचारपछि बीएन्डसी बिर्तामोड।
भुपेन्द्र खड्का (२०), दमक–३ – अनुहार र घाँटीमा चोट, बोल्न सक्ने मध्यम अवस्था, लाईफलाइन दमकबाट थप उपचारका लागि धरान।
सागर हेमरम (२०), गौरीगञ्ज–१ – अनुहार, छातीमा चोट, बोल्न सक्ने मध्यम अवस्था, विर्तामोड रेफर।
अभिषेक चेम्जोङ (१८), दमक–१ – अनुहारमा चोट, अवस्था सामान्य, विर्तामोड रेफर।
प्रयुस चौहान (१९), उर्लाबारी–४ – दाहिने हात, खुट्टा र छातीमा चोट, नोबेल अस्पताल विराटनगर।
युनिस दाहाल (१८), शिवसताक्षी–११ – कान र घाँटीमा चोट, नोबेल अस्पताल विराटनगर।
साईन राई (२४), चुलाचुली–३, इलाम – दाहिने खुट्टामा चोट, लाईफलाइन दमकमा उपचाररत।
अविनाश राई (१९), कमल–५ – हात र खुट्टामा चोट, नोबेल अस्पताल विराटनगर।
औसन रिमाल (१७), दमक–१० – हातमा चोट, विर्तामोडमा थप उपचार।
रोयल रिजाल (१८), दमक–७ – दुवै खुट्टामा चोट, लाईफलाइन दमकमा उपचाररत।
प्रदिप खरेल (३३), बिर्तामोड–५ – दाहिने खुट्टामा चोट, बीएन्डसीमा उपचार, अवस्था सामान्य।
सन्देश गिरी (१६), बिर्तामोड – अश्रुग्याँसको धुवाबाट घाइते, बिर्तासिटी अस्पतालमा, अवस्था सामान्य।
जिल्ला प्रहरी कार्यालयका अनुसार प्रदर्शनका क्रममा केहीलाई नियन्त्रणमा पनि लिइएको छ। घाइतेहरूको अवस्था भने अधिकांश सामान्य रहेको जनाइएको छ।
