Blog

भदौ १४, दमक / राष्ट्रिय प्रजातन्त्र पार्टी (राप्रपा) झापाको अध्यक्षमा पुनः केशवप्रसाद ओझा चयन भएका छन्। शनिबार बिर्तामोडको अतिथि सदनमा सुरु भएको जिल्ला अधिवेशनले ओझालाई दोस्रो कार्यकालका लागि अध्यक्ष घोषणा गरेको हो।

निर्वाचन समितिका टंक कटवालका अनुसार अध्यक्ष पदका लागि ओझाबाहेक अन्य कसैले पनि मनोनयन दर्ता नगरेपछि सर्वसम्मत रूपमा उनी चयन भएका हुन्। हिजो अन्तिम नामावली प्रकाशन गरिएको थियो।

अधिवेशनले ओझाको अध्यक्षतामा ३७ सदस्यीय जिल्ला समिति घोषणा गर्नेछ भने थप १२ जना सदस्य अध्यक्षले मनोनयन गर्ने व्यवस्था गरिएको छ। दोस्रो कार्यकालका लागि अध्यक्षमा निर्वाचित हुन लागेका ओझा यसअघि दुई कार्यकाल जिल्ला सचिवसमेत भइसकेका थिए। राप्रपाको विधानअनुसार कुनै पनि पदमा अधिकतम दुई कार्यकालसम्म रहन पाउने व्यवस्था छ।

आज बिहान ११:३० बजे अधिवेशनको औपचारिक उद्घाटन पार्टीका केन्द्रीय अध्यक्ष तथा पूर्व उपप्रधानमन्त्री राजेन्द्र लिङ्देनले गर्नुभएको छ। कार्यक्रममा पार्टीका कोशी प्रदेश अध्यक्ष राम थापा, केन्द्रीय प्रवक्ता एवं संसदीय दलका प्रमुख सचेतक ज्ञानेन्द्र शाहीलगायतका नेताहरूको उपस्थिति रहेको जनाइएको छ।

भदौ १४, दमक / झापाको दमकमा डिपीएल नेपाल र गार्जियन बोर्डबीच संयुक्त बैठक सम्पन्न भएको छ। बैठकमा डिपीएल नेपालले अर्धवार्षिक शाखा रिपोर्टिङ प्रस्तुत गर्दै संस्थाका गतिविधिलाई अझ सशक्त बनाउने विषयमा अन्तरक्रिया गरिएको थियो।

बैठकमा डिपीएल नेपालका वरिष्ठ उपाध्यक्ष दिवस खतिवडाले डिपीएल मातहतका शाखाहरूको गतिविधि र प्रगति प्रतिवेदन प्रस्तुत गर्नुभयो। सो अवसरमा डिपीएल नेपालकी अध्यक्ष अनु आचार्य भण्डारीले संस्थालाई अझ प्रभावकारी ढंगले अघि बढाउने रणनीतिबारे जानकारी दिनुभयो।

त्यसैगरी, डिपीएल नेपालका संस्थापक अध्यक्ष बिनोद उप्रेती र डिपीएल २०२३ का अध्यक्ष हेमन्त नेपालले डिपीएल कमलद्वारा सञ्चालित ओम शान्ति डेन्टल हस्पिटल भित्र रहेको बुक कर्नरमा पुस्तक हस्तान्तरण गर्दै अवलोकन समेत गर्नुभएको डिपीएल नेपालका उपाध्यक्ष कमल गैरेले जानकारी दिनुभयो ।

बैठकमा गार्जियन बोर्डका महासचिव देवेन्द्र परसाईले सञ्चालन गर्नुभएको कार्यक्रम डिपीएलका संस्थापक अध्यक्ष भेसराज न्यौपानेको अध्यक्षतामा सम्पन्न भएको थियो।

भदौ १३, दमक / दमक नगरपालिका वडा नम्बर ७ ले आज एकैसाथ दुई महत्वपूर्ण कार्यक्रम सम्पन्न गरेको छ। वडा कार्यालयको सभा कक्षमा आयोजना गरिएको कार्यक्रममा उत्कृष्ट टोल विकास संस्था र उत्कृष्ट करदाताहरुलाई सम्मान गरिएको छ।

वडामा सम्पन्न योजनाहरुमा उत्कृष्ट सहकार्य र समन्वय गर्ने संस्थाको रुपमा लक्ष्मी टोल विकास पहिलो, बराह टोल विकास दोस्रो र संरक्षण टोल विकास तेस्रो भएर सम्मानित भए। संस्थागत करदातामा सिद्धार्थ बोर्डिङ स्कुललाई, व्यक्तिगत सामान्य करदातामा गौमाया कटुवाललाई, व्यक्तिगत उच्च करदातामा बलराम पराजुलीलाई, पहिलो व्यवसाय राजस्व बुझाउनेतर्फ गणेश श्रेष्ठ, शारदा श्रेष्ठ र महेश विश्वकर्मालाई सम्मान गरिएको वडा सचिव योगेश भट्टराईले जानकारी दिए। त्यस्तै उत्कृष्ट कार्य सम्पादन गर्ने कर्मचारीका रुपमा जीवन कोइरालालाई पनि सम्मान गरिएको छ।

कार्यक्रममा वडा अध्यक्ष भीमप्रसाद पौडेल, वडा सदस्य अतीत बान्तवा राई र तारादेवी रणपहेलीले सम्मान हस्तान्तरण गरेका थिए। सोही अवसरमा बालमैत्री वडा घोषणाका लागि आवश्यक सूचकहरुको अवस्था बारे महिला, बालबालिका तथा ज्येष्ठ नागरिक शाखा प्रमुख सरिता भण्डारीले सूचकहरुको प्रमाणीकरणबारे जानकारी दिँदै २०८३ भित्रै सिङ्गो दमक नगरलाई बालमैत्री स्थानीय शासनयुक्त नगर घोषणा गर्ने लक्ष्यमा यसले महत्व राख्ने बताइन्।

कार्यक्रममा टोल विकास संस्थाका प्रतिनिधि, विद्यालयका प्रमुख तथा रेडक्रस दमक उपशाखाका पदाधिकारीहरुले शुभकामना मन्तव्य व्यक्त गरेका थिए। कार्यक्रममा वडा सदस्य अतीत बान्तवाले स्वागत मन्तव्य राखेका थिए भने सञ्चालन वडा सचिव योगेश भट्टराईले गरेका थिए।

भदौ , १३ झापा / सिम्रिक यातायात ट्राभल्स एण्ड टुर्सले झापाको कनकाई नगरपालिका–भुरुङ्गामा शुक्रबार एक विशेष समारोहका बीच आफ्नो सेवा औपचारिक रूपमा शुभारम्भ गरेको छ। कम्पनीले नव प्राप्त आठवटा गाडीको विधिवत पूजाआजा गर्दै यात्रु सेवामा सञ्चालनमा ल्याएको हो।

समारोहका प्रमुख अतिथि जिल्ला ट्राफिक प्रहरी कार्यालय झापाका प्रमुख गणेश पौडेलले निजी क्षेत्रको सक्रिय योगदानले यातायातलाई व्यवस्थित, सुरक्षित र समयानुकूल बनाउन सकिने बताउँदै सिम्रिक यातायातले पूर्वी नेपालमा स्तरीय सेवा दिने विश्वास व्यक्त गर्नुभयो। उहाँले यात्रुको सुरक्षा, ट्राफिक नियमको पालना र सचेततामार्फत दुर्घटना न्यूनीकरणमा जोड दिन आग्रह गर्नुभयो।

कम्पनीका अध्यक्ष रेवती प्रसाद पाण्डे (कुमार) ले अध्यक्षता गर्नुभएको कार्यक्रममा यात्रु सेवा, समयपालन र व्यवहारमैत्री सेवामा कम्पनी प्रतिबद्ध रहेको जानकारी दिनुभयो। उहाँका अनुसार, सिम्रिकले झापा, मोरङ, सुनसरीलगायतका जिल्लामा सेवा विस्तार गरिसकेको छ।

त्यस्तै, प्रबन्ध निर्देशक शर्मिला अधिकारीले प्रमुख अतिथि तथा उपस्थित अतिथिहरूलाई मायाको चिनो प्रदान गर्दै कम्पनीलाई दिएको विश्वास र सद्भावप्रति आभार व्यक्त गर्नुभयो। उहाँले यातायात क्षेत्रमा नयाँ दृष्टिकोणसहित सुरक्षित र आधुनिक प्रविधि प्रयोग गरी सेवा प्रवाह गर्ने प्रतिबद्धता जनाउनुभयो। कार्यक्रममा स्थानीय, यातायात व्यवसायी, सुरक्षाकर्मी, पत्रकार तथा विभिन्न क्षेत्रका व्यक्तिहरूको सहभागिता थियो।

कम्पनीले प्रारम्भिक चरणमा झापाको काकडभिट्टा र गौरीगञ्ज, मोरङको बिराटनगर र सुनसरीको धरानसम्म सेवा विस्तार गरेको जनाएको छ। यात्रुलाई फरक स्वाद दिने उद्देश्यसहित सेवा सञ्चालनमा ल्याइएको कम्पनीका प्रमुख कार्यकारी अधिकृत आयुष बोगटीले जानकारी दिनुभयो।

साथै, कम्पनी इन्चार्ज जिवन थापाले सिम्रिकलाई पूर्वी नेपालमा विश्वासिलो, समयमै सेवा दिने र यात्रामा सहजता ल्याउने यातायात कम्पनीका रूपमा स्थापित गर्ने लक्ष्य रहेको बताउनुभयो।

दमक, भदौ १३ – झापाको दमकस्थित सूर्यमुखी बचत तथा ऋण सहकारी संस्थाले शनिबार दशौं वार्षिक साधारण सभा सम्पन्न गरेको छ। मारवाडी सेवा समितिको सभाहलमा आयोजित कार्यक्रममा प्रमुख अतिथि झापा जिल्ला सहकारी सङ्घका अध्यक्ष प्रेमकुमार कोइराला रहनुभएको थियो।

विशिष्ट अतिथिमा जिल्ला सहकारी सङ्घका सञ्चालक सदस्य तथा फागुनन्द सहकारी संस्थाका अध्यक्ष पदम लिम्बु, जिल्ला बचत तथा ऋण सहकारी सङ्घका अध्यक्ष तुलाराम न्यौपाने लगायतको उपस्थिति थियो। कार्यक्रममा सीएनसी झापाका अध्यक्ष खेमप्रसाद बगाली, राष्ट्रिय सहकारी बैंक दमक शाखा प्रबन्धक अर्जुन कार्की र संस्थापक अध्यक्ष प्रेमप्रसाद न्यौपानेले शुभकामना मन्तव्य राख्नुभएको थियो।

वार्षिक प्रतिवेदन प्रस्तुत गर्दै संस्थाका अध्यक्ष चुडामणि ओझाले कोभिड–१९ को असर, खुला सिमानाका कारण उद्योगधन्दा र व्यापार व्यवसायमा आएको मन्दी, युवा विदेश पलायन लगायतका कारण बजार सुस्त भएको बताउनुभयो। उहाँका अनुसार विगत तीन वर्ष तरलताको अभाव रहे पनि हाल बढी तरलता भएको र त्यसकै कारण वित्तीय संस्थाहरू दबाबमा परेको उल्लेख गर्नुभयो। अहिले कर्जा लगानी दर घटेको र केही सदस्यहरूको कर्जा तिर्ने क्षमता कमजोर हुँदा खराब कर्जा दर बढ्दै गएको पनि जानकारी दिनुभयो।

लेखा समिति संयोजकले प्रस्तुत गरेको प्रतिवेदनमा संस्थाले विगत वर्षभन्दा नाफा घटेपनि नियमित सेवा निरन्तरता दिएको, बाह्य ऋण न्यून बनाउने नीति अपनाएको र सदस्यको पुँजी परिचालनमा जोड दिएको उल्लेख थियो।

कार्यक्रममा प्रमुख अतिथि कोइरालाले सहकारी क्षेत्रलाई सबल बनाउन सहकार्य र मर्जर आवश्यक भएकोमा जोड दिनुभयो। यसै अवसरमा उत्कृष्ट बचत तथा ऋण कारोबार गर्ने सेयर सदस्यहरूलाई सम्मान गरिएको थियो। कार्यक्रम सहकारी अध्यक्ष चुडामणि ओझाको अध्यक्षतामा सम्पन्न भएको हो।

दमक , भदौ १३ /  दमक नगरपालिकाको नगर प्रहरी बलले शुक्रबार बिहान नयाँ सब्जी बजार क्षेत्रमा फूटपातमा राखिएका सामान हटाएको छ।

नगर प्रहरीले बारम्बार सूचना पत्राचार गरे पनि व्यवसायीहरूले अटेर गर्दै फूटपातमा सामान राखिरहेपछि कारबाहीस्वरूप सबै सामान हटाइएको हो। सेवाग्राहीहरू सहज रूपमा हिँड्न सकून् भन्ने उद्देश्यका साथ फूटपात सफा गरिएको नगर प्रहरी प्रमुख रुद्रजंग कार्कीले जानकारी दिनुभयो।

दमक नगरपालिकाले सडक र सार्वजनिक स्थानलाई व्यवस्थित गर्न निरन्तर अभियान सञ्चालन गर्दै आएको छ।

दमक, १२ भाद्र २०८२ – भौतिक पूर्वाधार तथा यातायात मन्त्री देवेन्द्र दाहालले वर्तमान सरकारले समृद्धिको यात्रालाई गति दिएको दाबी गरेका छन्। बिहीबार झापाको दमकमा प्रेस चौतारी झापाले आयोजना गरेको पत्रकार भेटघाट कार्यक्रममा मन्त्री दाहालले विकास र समृद्धिका लागि यो गठबन्धन कायम रहने विश्वास व्यक्त गरे।

उनले देशमा केही भएन भन्नेहरु नागरिकमा भ्रम छर्ने काममा लागेको आरोप लगाउँदै सरकार ठोस योजनासहित अघि बढिरहेको स्पष्ट पारे।

यसअघि मन्त्री दाहालले दमकस्थित सडक डिभिजन परिसरमा निर्माण सम्पन्न भएको सडक आयोजना कार्यालय भवनको उद्घाटन गरेका थिए। काँकडभिट्टा–लौकही सडक योजना (पूर्वी खण्ड) अन्तर्गत निर्माण गरिएको उक्त कार्यालय ८ करोड ७ लाख रुपैयाँ लागतमा सम्पन्न भएको हो।

उद्घाटन कार्यक्रममा मन्त्री दाहालले निर्धारित समयमै सडक विस्तारका काम सम्पन्न गर्न सम्बन्धित निकायलाई निर्देशन दिएका थिए। योजना प्रमुख सुनिलबाबू पन्तका अनुसार आयोजना सम्पन्न भएपछि सो भवन सडक डिभिजन कार्यालयलाई हस्तान्तरण गरिनेछ।

कार्यक्रममा सडक विभागका महानिर्देशक डा. विजय जैशी, एडीबी परियोजना प्रमुख चुडाराज ढकाललगायत विभागका अधिकारीहरूको उपस्थिति रहेको थियो। प्रेस चौतारी झापाका उपाध्यक्ष राजु पोख्रेलको अध्यक्षतामा सम्पन्न पत्रकार भेटघाटको सञ्चालन कोषाध्यक्ष सरोज भट्टराईले गरेका थिए।