वैशाख ३०, कमल / कमल गाउँपालिका–५, पाडाजुङ्गीस्थित स्मारिका सामुदायिक बोर्डिङ स्कुल ले यस वर्षको माध्यमिक शिक्षा परीक्षा (एसईई) २०८२ मा उत्कृष्ट नतिजा हासिल गर्दै पालिकामै आफ्नो शैक्षिक पहिचान थप मजबुत बनाएको छ। विद्यालयबाट परीक्षामा सहभागी भएका ३७ जना विद्यार्थी सबै उत्तीर्ण हुँदै शतप्रतिशत नतिजा ल्याउन सफल भएका हुन्। नतिजाअनुसार विद्यार्थी सुमित राज बिष्ट ले ४.० जीपीए हासिल गर्दै विद्यालय टप गरेका छन्।
विद्यालयले सार्वजनिक गरेको विवरणअनुसार १ जनाले ४.० जीपीए, २९ जनाले ३.६ देखि ३.९९ जीपीए तथा ७ जनाले ३.२ देखि ३.५९ जीपीए प्राप्त गरेका छन्। विद्यालयका प्रिन्सिपल गुणराज गिरी ले विद्यार्थीहरूको मेहनत, शिक्षकहरूको समर्पण, अभिभावकहरूको साथ तथा अनुशासित शैक्षिक वातावरणका कारण यस्तो उपलब्धि सम्भव भएको बताउनुभयो। स्थानीय स्तरमा गुणस्तरीय शिक्षाका लागि परिचित बन्दै गएको विद्यालयले पछिल्ला वर्षहरूमा निरन्तर उत्कृष्ट नतिजा दिँदै आफ्नो शैक्षिक पहिचान अझ सुदृढ बनाउँदै गएको छ।
