Blog

चैत ७, दमक / दमक–८ स्थित राष्ट्रिय बहुमुखी सहकारी संस्थाले आयोजना गरेको खुला रक्तदान कार्यक्रममा ५४ पिन्ट रगत संकलन भएको छ। सामाजिक उत्तरदायित्व अन्तर्गत आयोजित कार्यक्रममा ११ महिलासहित ५४ जनाले रक्तदान गरेका हुन्।

रक्तदान कार्यक्रममा सामाजिक अगुवा तथा राजनीतिकर्मी रन्जित तामाङ, संस्थाका सञ्चालक समितिका सदस्य विष्णु सुब्बा, व्यवस्थापक प्रकाश राई, कमल गाउँपालिका स्वास्थ्य शाखा प्रमुख दिपक दाहाल, कर्मचारीहरू राजन केसी, चन्द्रबहादुर कन्दङवा, मिना राई तथा पत्रकारहरू अनिलदेव राई, मनकुमार गदाल, सुजन गौतम लगायतले सहभागिता जनाएका थिए। साथै शेयर सदस्यहरू मिलन राई, ओजाहाङ लिम्बू, मनु साम्पाङ, सुसन राई लगायतले पनि रक्तदान गरेको सचिव दिपेनवाला राईले जानकारी दिए।

संस्थाले हरेक वर्ष सञ्चालन गर्दै आएको वार्षिक कार्यक्रम अन्तर्गत यस वर्ष पनि खुला रक्तदान कार्यक्रमलाई निरन्तरता दिएको हो। संस्थाका अध्यक्ष लछुदास राईका अनुसार सामाजिक सेवामूलक कार्य अन्तर्गत सहकारीले लामो समयदेखि नियमित रूपमा रक्तदान कार्यक्रम गर्दै आएको छ।

नेपाल रेडक्रस सोसाइटी दमक उपशाखाको प्राविधिक सहयोग तथा कमल गाउँपालिकाका अध्यक्ष हुकुमसिंह राईको प्रमुख आतिथ्यतामा सम्पन्न कार्यक्रमको उद्घाटन गरिएको थियो। कार्यक्रममा सामाजिक अगुवा गणेश गौतम, जितु धिमाल, लेखा संयोजक इन्द्रमान चाम्लिङ, सल्लाहकार लोकप्रसाद कन्दङवा, सुमित्रा वाङदेल लगायतको उपस्थिति रहेको थियो।

कार्यक्रममा बोल्दै प्रमुख अतिथि राईले सहकारी संस्थाहरूले सामाजिक सेवाका क्षेत्रमा अझ सक्रिय भूमिका खेल्नुपर्नेमा जोड दिए।२६ वर्षअघि स्थापना भएको उक्त सहकारीले हालै इलामको चुलाचुली र मोरङको पथरीशनिश्चरेमा सेवा केन्द्र विस्तार गर्दै आफ्नो सेवा क्षेत्र बढाउँदै लगेको जनाएको छ।

चैत ६, दमक / दमक नगरपालिका भित्र मेयर र उपमेयरबीचको विवादकै बीच १८औँ नगरसभा सम्पन्न भएको छ। नगरप्रमुख रामकुमार थापाले बैठकको प्रारम्भ गर्दै विषय प्रवेश गराएपछि सभा अघि बढाइएको थियो।

सभामा प्रस्तुत हुने विषयवस्तुका सम्बन्धमा नगरप्रमुख थापाले कार्यसूची अघि सारेका थिए। सो क्रममा उपप्रमुख रेगिना भट्टराई प्रसाईले पेश गर्नुपर्ने प्रस्ताव तथा प्रतिवेदन पनि समावेश गरिएको थियो। तर उपप्रमुख भट्टराईले नगरसभा अघि नै पत्रकार सम्मेलन गर्दै आफू सहभागी नहुने जानकारी गराएकी थिइन्।

नगरसभाको बैठकमा उपप्रमुखको उपस्थिति नभएको पुष्टि भएपछि नगरप्रमुख थापाले १० मिनेटका लागि बैठक स्थगित गर्दै तत्काल कार्यपालिकाको बैठक बोलाउने निर्णय गरेका थिए। त्यसपछि बसेको कार्यपालिकाको बैठकले उपप्रमुखको अनुपस्थितिमा उहाँ संयोजक रहेका समितिका प्रतिवेदन तथा प्रस्तावहरू अन्य सदस्यहरूले पेश गर्ने निर्णय गरेको थियो।

यस निर्णयपछि पुनः सुरु गरिएको नगरसभामा विभिन्न प्रतिवेदनहरू पेश गर्दै १८औँ नगरसभा सम्पन्न गरिएको छ। साथै, आर्थिक वर्ष २०८२/०८३ का लागि विनियोजन गरिएको बजेट तथा नीति–कार्यक्रम परिमार्जनका लागि प्रस्ताव गरिएको छ।

नगरसभामा प्रस्तुत विवरण अनुसार चालु आर्थिक वर्षको १० महिनाको अवधिमा १७औँ नगरसभाबाट स्वीकृत १ अर्ब ४७ करोड रुपैयाँ बजेटअन्तर्गत अधिकांश कार्यक्रम कार्यान्वयनको चरणमा रहेका छन्। केही आयोजना सम्पन्न हुने अवस्थामा पुगेका छन् भने केही सञ्चालन तथा संशोधनको चरणमा रहेका छन्।

आयतर्फ संघीय सरकारबाट ३४ करोड ३८ लाख ३३ हजार, प्रदेश सरकारबाट १ करोड ३८ लाख, राजश्व बाँडफाँडबाट १२ करोड ७५ लाख र आन्तरिक स्रोतबाट १२ करोड ८६ लाख गरी कुल ६४ करोड रुपैयाँ आम्दानी भएको छ। त्यस्तै खर्चतर्फ चालु खर्च ३५ करोड ८९ लाख र पूँजीगत खर्च ११ करोड १७ लाख गरी कुल ४७ करोड ६ लाख रुपैयाँ खर्च भएको जनाइएको छ।

हालको अवस्थामा विनियोजन ऐन २०८२ अन्तर्गत कुल बजेटमा कुनै परिवर्तन नगरी कार्यक्रमहरू मात्रै संशोधन गर्ने प्रस्ताव नगरसभामा पेश गरिएको छ।

काठमाडौं, फागुन २८ / बजारमा देखिएको ग्यास अभावलाई मध्यनजर गर्दै नेपाल आयल निगमले अबदेखि खाना पकाउने ग्यास आधा सिलिन्डर मात्र वितरण गर्ने निर्णय गरेको छ। बिहीबार बसेको निगमको सञ्चालक समितिको बैठकले यस्तो निर्णय गरेको हो।

निगमका कार्यकारी निर्देशक चण्डीकाप्रसाद भट्टका अनुसार उपभोक्ताहरूले आवश्यकभन्दा बढी ग्यास सिलिन्डर भण्डारण गर्न थालेपछि बजारमा आपूर्ति व्यवस्थापन गर्न आधा सिलिन्डर ग्यास मात्र पठाउने निर्णय गरिएको हो।

हाल एक सिलिन्डरमा १४.२ केजी ग्यास रहने व्यवस्था छ। तर नयाँ निर्णयअनुसार अब प्रत्येक सिलिन्डरमा ७.१ केजी मात्र ग्यास भरेर वितरण गरिनेछ। पछिल्लो दुई महिनादेखि बजारमा ग्यासको अभाव देखिनुका साथै पश्चिम एसियामा बढ्दो द्वन्द्वको प्रभावले पनि उपभोक्ताहरूमा ग्यास भण्डारण गर्ने प्रवृत्ति बढेको बताइएको छ।

नेपाल आयल निगमले भारतको इन्डियन आयल कर्पोरेसन (आईओसी) बाट ग्यास खरिद गर्दै आएको छ। तर पछिल्लो समय भारतबाट मागअनुसार ग्यास आपूर्ति हुन नसक्दा समस्या बढ्दै गएको छ। नेपालमा दैनिक औसतमा करिब १२० बुलेट ग्यास आवश्यक पर्ने भए पनि हाल करिब ८० बुलेट मात्रै आइरहेको छ। यसअघि पनि २०७२ सालमा भारतले लगाएको नाकाबन्दीका बेला सरकारले आधा सिलिन्डर ग्यास वितरण गर्ने व्यवस्था गरेको थियो।

फागुन १६, झापा । प्रतिनिधि सभा निर्वाचन नजिकिँदै गर्दा झापा क्षेत्र नं.–५ मा निर्वाचन आचारसंहिता उल्लङ्घनका घटना बढेको भन्दै नेपाली कम्युनिष्ट पार्टी (नेकपा)ले गम्भीर ध्यानाकर्षण भएको जनाएको छ।
फागुन १६ गते दमकको सङ्गम स्विटस्थित पत्रकार सम्मेलन मार्फत प्रेस विज्ञप्ति जारी गर्दै विज्ञप्तिमार्फत पार्टीको मूल निर्वाचन परिचालन समिति, क्षेत्र नं.–५ ले निर्वाचन आचारसंहिता विपरीत गतिविधि भइरहेको आरोप लगाएको हो। विज्ञप्तिमा नेकपाका अध्यक्ष केपी शर्मा ओली र कोशी प्रदेशका मुख्यमन्त्री हिक्मत कार्कीले निर्वाचन आचारसंहिता उल्लङ्घन गरेको दाबी गरिएको छ।
विज्ञप्तिमा सत्ता र शक्तिको आडमा बजेट, योजना तथा विभिन्न प्रलोभन बाँडफाँड गरी निर्वाचन परिणाम प्रभावित पार्ने प्रयास भइरहेको आरोप लगाइएको छ। साथै, चुनाव उत्कर्षतर्फ जाँदै गर्दा विभिन्न सञ्चारमाध्यममार्फत तथ्यहीन र भ्रामक समाचार सम्प्रेषण गरी मतदातामा भ्रम सिर्जना गर्ने प्रयास भइरहेको उल्लेख गरिएको छ।
पार्टीका तर्फबाट निर्वाचन परिचाल समितिका संयोजक सुरेन्द्र बस्नेतले हस्ताक्षर गरेको विज्ञप्तिमा यस्ता गतिविधि तत्काल रोक्न सम्बन्धित पक्षसँग माग गरिएको छ। साथै निष्पक्ष, स्वच्छ र शान्तिपूर्ण निर्वाचन सम्पन्न गर्न सबै पक्ष जिम्मेवार बन्नुपर्नेमा जोड दिइएको छ।
त्यस्तै, कमल गाउँपालिकामा पत्रकार अर्जुन आचार्य माथि भएको भनिएको दुर्व्यवहारप्रति पनि पार्टीले आपत्ति जनाउँदै दोषीमाथि कडा कारबाहीको माग गरेको छ। नेकपाका उम्मेदवार रन्जित तामाङले लोकतान्त्रिक मूल्य–मान्यताअनुसार चुनावी प्रक्रिया अघि बढाउन आग्रह गर्दै मतदातालाई विवेकपूर्ण निर्णय गर्न अपिल गरेका छन्।